TTD: తిరుమలలో గదుల అద్దె పెంపుపై రాజకీయం బాధాకరం: ఈవో ధర్మారెడ్డి

తిరుమల: తిరుమలలో గదుల అద్దె పెంపు విషయంలో రాజకీయం చేయడం చాలా బాధాకరమని తితిదే ఈవో ధర్మారెడ్డి అన్నారు. వీఐపీలు బస చేసే అతిథి గృహాల్లోని 172 గదులను మాత్రమే ఆధునికీకరించి ధరలు పెంచామని స్పష్టం చేశారు. సామాజిక మాధ్యమాల్లో శ్రీవారి నుంచి సామాన్య భక్తులను దూరం చేస్తున్నారని ప్రచారం జరుగుతుండటంతో ఇవాళ ఈవో ధర్మారెడ్డి  అన్నమయ్య భవన్‌లో మీడియా సమావేశం నిర్వహించారు. ప్రముఖులకు సంబంధించి పద్మావతి, ఎంబీసీ కార్యాలయాల్లో గదులను ఇస్తారని, నారాయణగిరి, ఎస్వీ అతిథిగృహం, స్పెషల్‌ టైప్‌ అతిథి గృహాలు ఎంబీసీ కార్యాలయం కింద ఉన్నాయన్నారు. అందుకే రూ.8కోట్లతో ఆ అతిథిగృహాలను ఆధునికీకరించామన్నారు. ఏసీ, గీజర్‌ వంటి సౌకర్యాలు పెంచి గదుల అద్దె పెంచామన్నారు. ఒక్కొక్క గదికి రూ.5లక్షల చొప్పున ఖర్చు చేశామని వివరించారు. తిరుమలలో ఉన్న మిగతా రూ.50, రూ.100ల అద్దె గదుల ధరలు పెంచే ఆలోచన లేదని తెలిపారు. తిరుమలలో మొత్తం 7,500 గదులు, నాలుగు యాత్రిక సదన్‌లు ఉన్నాయన్నారు. రూ.50, రూ.100ల అద్దె గదులు 5వేలు ఉన్నాయని, ఈ ధరలు 40 ఏళ్ల క్రితం నిర్ణయించారని ఈవో వెల్లడించారు. రూ.50, రూ.100ల గదుల్లో ఫ్లోరింగ్‌, గీజర్లు వంటి వసతులు కల్పించామన్నారు.