Bridge: అదానీ కంపెనీకి చెందిన 6వేల కేజీల ఇనుప వంతెన మాయం..!

ముంబయి: చడీచప్పుడు లేకుండా 90 అడుగుల పొడవైన, 6 వేల కేజీల ఇనుప వంతెన(bridge ) మాయమైంది. నిత్యం బిజీగా ఉండే ముంబయి (Mumbai)లోని మలాడ్ ప్రాంతం ఇది కనిపించకుండా పోయింది. అది అదానీ ఎలక్ట్రిసిటీ సంస్థ (Adani Electricity)కు చెందిన వంతెన అని, ఈ చోరీ ఘటనకు సంబంధించి నలుగురు వ్యక్తుల్ని అరెస్టు చేసినట్లు పోలీసులు తెలిపారు.

అదానీ సంస్థకు చెందిన భారీ ఎలక్ట్రిక్ కేబుళ్లను తరలించేందుకు గత ఏడాది జూన్‌లో మలాడ్‌ ప్రాంతంలోని ఓ కాలువపై ఈ తాత్కాలిక ఇనుప వంతెనను సంస్థ ఏర్పాటు చేసింది. అయితే తర్వాత ఈ ఏప్రిల్‌లో ఆ కాలువపై మరో వంతెన నిర్మించారు. దాంతో ఆ ఇనుప వంతెనను వినియోగించట్లేదు. ఈ క్రమంలో కొద్దిరోజుల క్రితం 6 వేల కేజీల బరువున్న ఈ వంతెన ఇటీవల కనిపించకుండా పోయింది. రద్దీ ఉండే ప్రాంతం నుంచి అది మిస్‌ కావడంతో అంతా ఆశ్చర్యపోయారు. దీనిపై అదానీ సంస్థ పోలీసులకు ఫిర్యాదు చేయగా.. దర్యాప్తు చేసిన అధికారులు దొంగతనం జరిగిన తీరును తెలుసుకుని విస్తుపోయారు.

• ఇదీ చదవండి: Karnataka Assembly: దర్జాగా వచ్చి.. ఎమ్మెల్యే స్థానంలో కూర్చుని!

గ్యాస్ కట్టర్లతో వంతెనను ముక్కలుగా చేసి.. ఒక భారీ వాహనంలో దానిని తరలించిట్లు గుర్తించారు. ఈ కేసులో పోలీసులు నలుగురు వ్యక్తుల్ని అరెస్టు చేశారు. అందులో ఒకరికి ఈ వంతెన ఏర్పాటుతో సంబంధం ఉన్నట్లు తెలుస్తోంది. నిందితుడు ఈ వంతెన నిర్మాణం కోసం కాంట్రాక్టు పద్ధతిలో అదానీ సంస్థలో పనిచేసినట్లు పోలీసులు తెలిపారు. మిగిలిన ముగ్గురు అతడికి సహకరించారని వెల్లడించారు. ఇంకా దీని వెనక ఎవరైనా ఉన్నారా..? అనేదానిపై పోలీసులు దర్యాప్తు కొనసాగిస్తున్నారు.