మణిపుర్‌లో వెలుగులోకి మరో దారుణం!.. ఈ నెల 2న ఘటన

 కుకీ తెగ వ్యక్తి తల నరికి కంచెకు తగిలించిన దుండగులు

ఇంఫాల్‌: జాతుల మధ్య వైరంతో అట్టుడికిపోతున్న మణిపుర్‌లో మరో దారుణ ఘటన వెలుగులోకి వచ్చింది. కుకీ తెగకి చెందిన ఓ వ్యక్తి తలను నరికిన దుండగులు...దానిని వెదురు కర్రలతో చేసిన కంచెకు వేలాడ దీశారు. భయంకరమైన ఈ దృశ్యాలతో కూడిన వీడియో ఒకటి శుక్రవారం ఆన్‌లైన్‌లో ప్రత్యక్షమైంది. బిష్ణుపుర్‌ జిల్లాలోని ఓ నివాసిత ప్రాంతంలో ఈ నెల 2న ఈ హత్య జరిగినట్లు తెలుస్తోంది. ఆ రోజు రాత్రి 12 గంటల సమయంలో జరిగిన ఘర్షణలో ముగ్గురు ప్రాణాలు కోల్పోయారు. కంచెకు వేలాదీసిన తల డేవిడ్‌కు చెందినదిగా గుర్తించారు. ఇద్దరు కుకీ మహిళలను నగ్నంగా ఊరేగించిన ఘటనపై దేశవ్యాప్తంగా ఆగ్రహం, ఆందోళన వ్యక్తమవుతున్న విషయం తెలిసిందే. ఆ అమానుష ఘటన బాహ్య ప్రపంచానికి తెలిసిన తరుణంలోనే మరో దారుణం సభ్య సమాజాన్ని నివ్వెరపాటుకు గురిచేసింది.