కేరళ తీర ప్రాంతాన్ని ముంచెత్తిన కెరటాలు

తిరువనంతపురం: కేరళ తీరప్రాంతంలోని అనేక ప్రాంతాల్లో సాగర కెరటాలు విరుచుకుపడుతున్నాయి. కొన్నిచోట్ల సముద్రం ముందుకు చొచ్చుకొచ్చింది. ఈ పోకడను ‘కళ్లక్కడళ్‌’ అంటారు. దీనివల్ల తీరప్రాంతంలోని అనేక గ్రామాల్లో ఇళ్లు దెబ్బతిన్నాయి. రోడ్లు జలమయమయ్యాయి. దీంతో ప్రజలు సురక్షిత ప్రాంతాలకు తరలివెళ్లారు. కొన్ని ప్రాంతాల్లో మత్స్యకారులు తమ పడవలు, వలలను కాపాడుకోవడానికి తంటాలు పడ్డారు. దక్షిణ కేరళ, తమిళనాడులోని తీర ప్రాంతాల్లో ఆదివారం అర్ధరాత్రి వరకూ ఈ పోకడ కొనసాగుతుందని అధికారులు ‘ఆరంజ్‌ అలర్ట్‌’ జారీ చేశారు.హిందూ మహాసముద్రంలోని దక్షిణ ప్రాంతంలో బలమైన గాలులు పెరగడం వల్ల అకస్మాత్తుగా ఇలా జరుగుతుంది. కళ్లక్కడళ్‌ అంటే.. దొంగలా ఆకస్మికంగా వచ్చే సముద్రమని అర్థం.