పంజాబ్‌లో ఈడీ దాడులు.. సీఎం మేనల్లుడి నుంచి రూ.8 కోట్లు స్వాధీనం

దిల్లీ/చండీగఢ్‌: ఎన్నికల వేళ.. పంజాబ్‌లోని ఇసుక అక్రమ తవ్వక వ్యాపారులపై ఎన్‌ఫోర్స్‌మెంట్‌ డైరెక్టరేట్‌ (ఈడీ) నిర్వహించిన దాడుల్లో అధికారులు రూ.10 కోట్ల నగదు, రూ.21 లక్షల విలువైన బంగారం, రూ.12 లక్షల విలువైన చేతి గడియారం, పలు మొబైల్‌ ఫోన్లు జప్తు చేశారు. ఇందులో పంజాబ్‌ సీఎం చరణ్‌జీత్‌ సింగ్‌ చన్నీ మేనల్లుడు భూపీందర్‌ సింగ్‌ అలియాస్‌ హనీకి చెందిన రూ.8 కోట్లు కూడా ఉన్నాయి. ఈ మేరకు ఈడీ బుధవారం ఓ ప్రకటన విడుదల చేసింది. మిగిలిన రెండు కోట్లను సందీప్‌ కుమార్‌ అనే వ్యక్తికి చెందిన కార్యాలయాలు, నివాసాల నుంచి జప్తు చేశామని పేర్కొంది. చండీగఢ్‌, మొహాలి, లుథియానా, పఠాన్‌కోట్‌.. తదితర ప్రాంతాల్లో 12కు పైగా ప్రదేశాల్లో ఈడీ సోదాలు నిర్వహించింది. ఈ దాడులపై ఇప్పటికే సీఎం చరణ్‌జీత్‌ స్పందించారు. ఇవి రాజకీయ ప్రేరితమని ఆరోపించారు. పశ్చిమ బెంగాల్‌ ఎన్నికల సమయంలోనూ సీఎం మమతా బెనర్జీ బంధువుల ఇళ్లపై కేంద్రం ఈడీ దాడులు చేయించిందని, పంజాబ్‌లోనూ ఇప్పుడు అదే జరుగుతోందని చన్నీ విమర్శించారు.