అండమాన్‌ దీవులకు ధీర సైనికుల పేర్లు

పోర్ట్‌ బ్లెయర్‌: అండమాన్‌, నికోబార్‌ దీవుల్లోని 21 నిర్మానుష్య ద్వీపాలకు కేంద్ర ప్రభుత్వం పరమవీర చక్ర అవార్డులు పొందిన ధీర సైనికుల పేర్లు పెట్టింది. ఈ దీవుల్లో 16 ఉత్తర, మధ్య అండమాన్‌లో, అయిదు దక్షిణ అండమాన్‌లో ఉన్నాయి. మొట్టమొదటి నిర్మానుష్య దీవి అయిన ఐఎన్‌ఏఎన్‌ 370 నంబరు దీవికి సోమనాథ్‌ ద్వీపం అని నామకరణం చేశారు. 1947 నవంబరు 3న శ్రీనగర్‌ విమానాశ్రయంలో పాకిస్థానీ చొరబాటుదారులపై పోరులో ప్రాణాలు అర్పించి మొట్టమొదటి పరమవీర చక్ర పొందిన మేజర్‌ సోమనాథ్‌ శర్మ పేరును ఈ దీవికి పెట్టారు. ఇదే యుద్ధంలో ప్రాణత్యాగం చేసి పరమవీర చక్రను పొందిన మరో వీర సైనికుడు సుబేదార్‌ కరమ్‌ సింగ్‌ పేరును మరో నిర్మానుష్య దీవి ఐఎన్‌ఏఎన్‌ 308కి పెట్టారు. 1947 నుంచి పలు యుద్ధాల్లో వీరవిహారం చేసి పరమవీర చక్ర అవార్డులు పొందిన హవల్దార్‌ అబ్దుల్‌ హమీద్‌, సెకండ్‌ లెఫ్టినెంట్‌ అరుణ్‌ ఖేత్రపాల్‌, మేజర్‌ రామస్వామి పరమేశ్వరన్‌ తదితరుల పేర్లను మిగతా ద్వీపాలకు పెట్టారు.