Jharkhand HC: న్యాయమూర్తి హత్యకేసులో.. సీబీఐ దర్యాప్తుపై పర్యవేక్షణ

దిల్లీ: ఝార్ఖండ్‌లోని ధన్‌బాద్ జిల్లాలో ఓ సిట్టింగ్ న్యాయూమూర్తి హత్య కేసు విచారణలో కేంద్ర దర్యాప్తు సంస్థ(సీబీఐ) సాధించిన పురోగతిని ఝార్ఖండ్ హైకోర్టు ప్రధాన న్యాయమూర్తి వారానికొకసారి పర్యవేక్షించనున్నారు. ఈ మేరకు సోమవారం సుప్రీంకోర్టు ఆదేశాలు జారీ చేసింది. అలాగే ఈ ఘటనకు సంబంధించి ఇప్పటికే సీబీఐ అందించిన సీల్డ్ కవర్‌లో పెద్దగా వివరాలు లేవని సుప్రీం పెదవి విరిచింది. 

ధన్‌బాద్ జిల్లాకు చెందిన సిట్టింగ్ న్యాయమూర్తి జస్టిస్ ఉత్తమ్ ఆనంద్‌ను గతనెల గుర్తు తెలియని వ్యక్తులు ఆటోతో ఢీకొట్టి హత్య చేశారు. తొలుత ఆ ఘటనను ప్రమాదంగా భావించినా.. దర్యాప్తులో అది హత్యగా వెలుగులోకి వచ్చింది. జస్టిస్ ఆనంద్  ధన్‌బాద్‌లో అనేక మాఫియా కేసుల్ని విచారించారు. ఇటీవల ఇద్దరు గ్యాంగ్‌స్టర్లకు బెయిల్ నిరాకరించారు. ఆ తర్వాతే హత్య జరగడం కలకలం రేపింది. దీనిపై బార్ అసోసియేషన్ సుప్రీంకోర్టును ఆశ్రయించింది. జులై 30న సుప్రీం ఈ కేసును సుమోటాగా తీసుకుని విచారించడం ప్రారంభించింది. దానిలో భాగంగానే ఈ కేసు పర్యవేక్షణ బాధ్యతను ఝార్ఖండ్ హైకోర్టుకు అప్పగించింది.