Anil Firojiya: 32 కేజీలు తగ్గాను..! మంత్రి రూ.2,300 కోట్లు ఇచ్చారు..!!

(పాత చిత్రం)

ఉజ్జయిని: తన నియోజకవర్గ అభివృద్ధి కోసం కొన్ని నెలల వ్యవధిలో ఉజ్జయిని ఎంపీ అనిల్‌ ఫిరోజియా 32 కేజీలు తగ్గారు. అందుకు తగ్గట్టే రెండువేల కోట్లు రూపాయాలకు పైగా నిధులు దక్కించుకున్నారు. ఇక్కడ అభివృద్ధికి, బరువుకు సంబంధం ఏంటనిపిస్తోంది కదా..! ఇంతకీ ఏం జరిగిందంటే..?

ఉజ్జయినిలోని మాల్వాలో పలు అభివృద్ధి పనుల శంకుస్థాపన నిమిత్తం ఈ ఏడాది ఫిబ్రవరిలో నితిన్‌ గడ్కరీ ఆ ప్రాంతానికి వచ్చారు. ఆ సమయంలో అధిక బరువుతో ఉన్న ఎంపీ అనిల్ ఫిరోజియాను చూసి గడ్కరీ ఆశ్చర్యపోయారట. ఆరోగ్యాన్ని కాపాడుకోవాలంటే బరువు తగ్గాలని సూచించిన గడ్కరీ.. ఇందుకోసం ఎంపీకి ఓ సవాల్‌ కూడా విసిరారు. ‘‘తన నియోజకవర్గానికి నిధులు కేటాయించాలంటూ అనిల్‌ తరచూ నన్ను డిమాండ్‌ చేస్తుంటారు. అయితే, అందుకు ఆయనకు నేనే షరతు పెట్టాను. నేను కూడా గతంలో 135 కేజీలు ఉండేవాడిని. ఇప్పుడు 93 కేజీలకు తగ్గాను. నా పాత ఫొటో కూడా చూపించాను. నా కండిషన్‌ ఏంటంటే.. ఉజ్జయిని అభివృద్ధికి నిధులు కావాలంటే బరువు తగ్గాలని చెప్పాను. ఎన్ని కేజీలు తగ్గితే.. కేజీకి రూ.1000కోట్ల చొప్పున నిధులు కేటాయిస్తాను’’ అని గడ్కరీ స్టేజీ మీదే చెప్పారు.

అప్పటి నుంచి అనిల్‌ తన ఫిట్‌నెస్‌పైనే దృష్టిపెట్టారు. యోగా, ఫిజికల్ వర్కౌట్లు, స్విమ్మింగ్‌ వంటివి చేస్తున్నారు. ‘నేను మంత్రి సవాలును స్వీకరించాను. ఇప్పటివరకూ 32 కేజీల బరువు తగ్గాను. తాజాగా నేను నితిన్‌ గడ్కరీని కలిశారు. నన్ను చూసి ఆయన చాలా సంతోషించారు. తన వాగ్దానంలో భాగంగా రూ.2,300 కోట్ల విలువైన అభివృద్ధి ప్రణాళికలకు ఆమోదం తెలిపారు’ అని అనిల్ మీడియాకు వెల్లడించారు.