Cat: నాలాలో పడేసిన శిశువును రక్షించిన పిల్లి!

ముంబయి: మానవత్వానికి మాయని మచ్చతెచ్చేలా... ఓ వ్యక్తి పొత్తిళ్లలో చుట్టిన శిశువును నాలాలో పడేయగా, అక్కడే తచ్చాడుతున్న పిల్లి ఒకటి ఆ బిడ్డను రక్షించింది! ముంబయి శివారులోని ఘట్కోపర్‌ ఠాణా పరిధిలో ఈ ఘటన చోటుచేసుకుంది. గుర్తుతెలియని ఓ వ్యక్తి... వస్త్రాల్లో చుట్టిన ఓ శిశువును ఘట్కోపర్‌లోని రామాబాయ్‌నగర్‌ నాలాలో పడేశాడు. ఇది గమనించిన ఓ పిల్లి... అక్కడక్కడే తిరుగుతూ వింతగా ప్రవర్తించింది. నాలాలో శిశువు వద్దకు వెళ్లి బిగ్గరగా అరిచింది. ఈ క్రమంలో బిడ్డ ఏడవడంతో చుట్టుపక్కలవారు పరుగు పరుగున వచ్చి చూశారు. శిశువును రక్షించి, స్థానిక పోలీసులకు అప్పగించారు. వారు రాజవాడి ఆసుపత్రిలో బిడ్డను చేర్చి, కేసు నమోదు చేశారు. శిశువు సంపూర్ణ ఆరోగ్యంతో ఉన్నట్టు పోలీసులు తెలిపారు.