Atlee: షారుక్‌.. విజయ్‌ ఓ మల్టీస్టారర్‌

అభిమానులకు శుభవార్త. ప్రముఖ బాలీవుడ్‌ కథానాయకుడు షారుక్‌ఖాన్‌, తమిళ అగ్రహీరో విజయ్‌ ఒకే ఫ్రేమ్‌లో కనిపించనున్నారు. ఈ ప్రాజెక్టు ఖాయమనీ, ఇదే స్క్రిప్టుపై పని చేస్తున్నాననీ.. దర్శకుడు అట్లీ మంగళవారం ఓ ఇంటర్వ్యూలో పేర్కొన్నారు. దీంతో ఎన్నాళ్లుగానో వస్తున్న వార్తలకు ఇకపై తెర పడనుంది. ఈ విషయంపై మాట్లాడుతూ ‘చెన్నైలో ‘జిందా బందా’ పాట షూటింగ్‌ జరుగుతున్నప్పుడు విజయ్‌ అన్నని మా పార్టీకి ఆహ్వానించాను. ఆ సమయంలోనే షారుక్‌, విజయ్‌ కలిసి చాలాసేపు చర్చించుకున్నారు. ‘నువ్వు ఇద్దరు హీరోల సినిమా ఏదైనా చేయాలనుకుంటే చెప్పు.. మేం చేస్తాం’ అన్నారు షారుక్‌. విజయ్‌ అన్న సైతం దానికి ఒప్పుకున్నారు. ప్రస్తుతం ఆ స్క్రిప్ట్‌పైనే పని చేస్తున్నా. ఇద్దరి ఇమేజ్‌కి తగ్గట్టుగా కథ ఉండేలా కసరత్తు చేస్తున్నా. బహుశా షూటింగ్‌కి వెళ్లే నా తదుపరి చిత్రం అదే అవుతుంది’ అంటూ ఈ ఆసక్తికర కాంబినేషన్‌ వెనక ఉన్న కథని వివరించాడు అట్లీ.