balakrishna: అఖండ2.. రంగం సిద్ధమైందా?

‘అఖండ2’ చిత్రాన్ని పట్టాలెక్కించేందుకు రంగం సిద్ధమైందా? బోయపాటి శ్రీను దర్శకత్వం వహించనున్న తదుపరి చిత్రం అదేనా? అధికారిక సమాచారమైతే లేదు కానీ... చిత్ర పరిశ్రమలో ప్రస్తుతం ఈ విషయాలపైనే చర్చ జరుగుతోంది. ఇటీవలే బోయపాటి శ్రీను దర్శకత్వంలో గీతా ఆర్ట్స్‌ పతాకంపై ఓ సినిమా రూపొందనున్నట్టు ఆ సంస్థ అధికారికంగా ప్రకటించిన విషయం తెలిసిందే. కథానాయకుడు ఎవరనే వివరాల్ని మాత్రం వెల్లడించలేదు. అల్లు అర్జున్‌, సూర్య కోసం బోయపాటి శ్రీను కథలు సిద్ధం చేసుకున్నట్టు తెలిసింది. అయితే ఆ కథానాయకులు ప్రస్తుతం ఇతర చిత్రాలతో బిజీగా ఉన్నారు. ఈ దశలోనే బాలకృష్ణ - బోయపాటి శ్రీను కలయికలో సినిమా గురించి పరిశ్రమ వర్గాలు ప్రముఖంగా మాట్లాడుకోవడంతో ప్రాధాన్యం సంతరించుకుంది. మరి ఈ కలయికలో ‘అఖండ2’నే పట్టాలెక్కుతుందా లేక, వేరే కథతో సినిమా చేస్తారా అనేది తేలాల్సి ఉంది. ‘అఖండ’కి కొనసాగింపు ఉంటుందని ఆ సినిమా విడుదల సమయంలోనే స్పష్టం చేశారు దర్శకుడు బోయపాటి. ‘అఖండ 2’ కోసం ఇప్పటికే స్క్రిప్ట్‌ కూడా సిద్ధమైనట్టు సమాచారం. సమీకరణలన్నీ కుదిరితే ఆ సినిమానే పట్టాలెక్కే అవకాశాలున్నాయి. 2021లో ప్రేక్షకుల ముందుకొచ్చిన ‘అఖండ’ సంచలన విజయాన్ని సొంతం చేసుకుంది.