Cinema News: ‘జీ2’ సెట్స్‌లోకి బనితా సంధు

అడివి శేష్‌ కథానాయకుడిగా వినయ్‌ కుమార్‌ సిరిగినీడి తెరకెక్కిస్తున్న పాన్‌ ఇండియా చిత్రం ‘జీ2’. ‘గూఢచారి’ సినిమాకి కొనసాగింపుగా రూపొందుతోన్న ఈ చిత్రంలో బనితా సంధు కథానాయిక. ఆమె తాజాగా ఈ చిత్ర సెట్స్‌లోకి అడుగు పెట్టింది. ప్రస్తుతం గుజరాత్‌లోని భుజ్‌లో జరుగుతున్న షెడ్యూల్‌లో శేష్‌, బనితాలపై కీలక సన్నివేశాలు చిత్రీకరిస్తున్నారు. దీంట్లో వీళ్లిద్దరి కెమిస్ట్రీ అందర్నీ ఆకట్టుకుంటుందని.. ప్రేక్షకులకు మరపురాని అనుభూతిని అందించే లక్ష్యంగా ఈ చిత్రం కోసం పని చేస్తున్నామని చిత్ర వర్గాలు తెలిపాయి. స్పై యాక్షన్‌ థ్రిల్లర్‌గా రూపొందుతోన్న ఈ సినిమాలో ఇమ్రాన్‌ హష్మి ముఖ్య పాత్ర పోషిస్తున్నారు. టీజీ విశ్వప్రసాద్‌, అభిషేక్‌ అగర్వాల్‌ సంయుక్తంగా నిర్మిస్తున్నారు.

‘డియర్‌’ వచ్చేది ఆ రోజే

జి.వి.ప్రకాశ్‌ కుమార్‌, ఐశ్వర్య రాజేశ్‌ జంటగా ఆనంద్‌ రవిచంద్రన్‌ తెరకెక్కించిన చిత్రం ‘డియర్‌’. వరుణ్‌ త్రిపురనేని, అభిషేక్‌ రామిశెట్టి, జి.పృథ్వీరాజ్‌ సంయుక్తంగా నిర్మించారు. ఈ సినిమాని తెలుగులో అన్నపూర్ణ స్టూడియోస్‌, ఏషియన్‌ సినిమాస్‌ సంస్థలు సంయుక్తంగా విడుదల చేయనున్నాయి. ఈ విషయాన్ని రెండు నిర్మాణ సంస్థలు శుక్రవారం ప్రకటించాయి. ఈ చిత్ర ఆంధ్ర హక్కుల్ని అన్నపూర్ణ స్టూడియోస్‌ సొంతం చేసుకోగా.. తెలంగాణ హక్కుల్ని ఏషియన్‌ సినిమాస్‌ దక్కించుకుంది. భిన్నమైన కామెడీ ఫ్యామిలీ డ్రామాగా రూపొందిన ఈ చిత్రం తమిళంలో ఏప్రిల్‌ 11న విడుదల కానుండగా.. తెలుగు వెర్షన్‌ ఏప్రిల్‌ 12న థియేటర్లలోకి రానుంది. ఈ చిత్రానికి సంగీతం: జి.వి.ప్రకాశ్‌, ఛాయాగ్రహణం: జగదీశ్‌ సుందరమూర్తి.