Keerthy Suresh: తొలి హిందీ చిత్రం కాస్త ఆలస్యం?

భాషతో సంబంధం లేకుండా వరుస సినిమాలతో బిజీగా గడుపుతోంది కీర్తి సురేశ్‌. త్వరలో ఆమె ‘బేబీ జాన్‌’తో ప్రేక్షకులను పలకరించనుంది. ఆమె, బాలీవుడ్‌ కథానాయకుడు వరుణ్‌ ధావన్‌ జంటగా నటిస్తున్న చిత్రమిది. ఇంటెన్స్‌ యాక్షన్‌ థ్రిల్లర్‌ నేపథ్యంలో ఎ.కాలీస్‌ తెరకెక్కిస్తున్నారు. వామికా గబ్బీ కీలక పాత్ర పోషిస్తుంది. ఇటీవలే ఈ సినిమా చిత్రీకరణను ప్రారంభించారు. మే 31న ఇది విడుదల కానున్న సంగతి తెలిసిందే. ఇప్పుడీ సినిమా రాకకు ఆలస్యం కానున్నట్లు తెలుస్తోంది. ‘‘అనుకున్న తేదీకి విడుదల చేయాలని చిత్రీకరణను వేగవంతం చేసింది చిత్రబృందం. కానీ.. పోస్ట్‌-ప్రొడక్షన్‌ పనులు తదితర కారణాల వల్ల జులైలో ప్రేక్షకుల ముందుకు తీసుకురావడానికి సన్నాహాలు చేస్తున్నారు. త్వరలో ఈ విషయాన్ని అధికారికంగా ప్రకటించనున్నార’’ని సన్నిహిత వర్గాలు తెలిపాయి. అట్లీ, జ్యోతి దేశ్‌పాండే, మురాద్‌ ఖేతానీ నిర్మిస్తున్నారు.