Vijay: విజయ్‌ గానం

‘గ్రేటెస్ట్‌ ఆఫ్‌ ఆల్‌టైమ్‌’తో సినీప్రియుల్ని అలరించేందుకు సిద్ధమవుతున్నారు విజయ్‌. ఆయన కథానాయకుడిగా నటిస్తున్న ఈ పాన్‌ ఇండియా చిత్రాన్ని వెంకట్‌ ప్రభు తెరకెక్కిస్తున్న సంగతి తెలిసిందే. ఏజీఎస్‌ ఎంటర్‌టైన్‌మెంట్‌ సంస్థ నిర్మిస్తోంది. మీనాక్షి చౌదరి కథానాయిక.  ప్రస్తుతం ఈ సినిమా చిత్రీకరణ  శరవేగంగా జరుగుతోంది. కాగా, ఈ చిత్రం కోసం విజయ్‌ స్వయంగా ఓ పాట పాడినట్లు సమాచారం. దీనిపై సంగీత దర్శకుడు యువన్‌ శంకర్‌ రాజా కూడా స్పష్టత ఇచ్చారు. ఇటీవల బెంగళూరులోని ఓ కచేరీలో పాల్గొన్న యువన్‌.. తమ రాబోయే సినిమా కోసం విజయ్‌ గాత్రంతో ఓ పాట రికార్డు చేసినట్లు వెల్లడించారు. ఈ గీతానికి వెంకట్‌ ప్రభు తండ్రి గంగై అమరన్‌ సాహిత్యమందించినట్లు ప్రచారం వినిపిస్తోంది. సైన్స్‌ ఫిక్షన్‌ యాక్షన్‌ థ్రిల్లర్‌గా రూపొందుతోన్న ఈ సినిమాలో విజయ్‌ ద్విపాత్రాభినయం చేస్తున్నారు. ప్రశాంత్‌, ప్రభుదేవా, స్నేహా, లైలా తదితరులు కీలక పాత్రలు పోషిస్తున్నారు.