‘లేడీ సూపర్‌స్టార్‌ నన్ను ప్రశంసిందోచ్‌..! జాన్వీకపూర్‌ భావోద్వేగం

ఇంటర్నెట్‌ డెస్క్‌: జాన్వీకపూర్ ‌(Janhvi Kapoor) తాజా చిత్రం ‘గుడ్‌ లక్‌ జెర్రీ’ (Good Luck Jerry) డిస్నీ ప్లస్‌ హాట్‌ స్టార్ ‌(Disney+ Hotstar)వేదికగా ప్రసారమవుతోంది. ఈ చిత్రం 2018లో వచ్చిన ‘కొలమావు కోకిల’(తెలుగులో ‘కోకో కోకిల’)అనే విజయవంతమైన తమిళ సినిమాకి రీమేక్‌. ‘కొలమావు కోకిల’లో ‘లేడీ సూపర్‌ స్టార్‌’ నయనతార (Nayanthara) కథానాయికగా నటించిన సంగతి తెలిసిందే. దీనికి సంబంధించి జాన్వీ కపూర్‌ ఒక ఆసక్తికరమైన అంశాన్ని ప్రేక్షకులతో పంచుకుంది. తనకు ‘లేడీ సూపర్‌ స్టార్‌ ప్రశంస’ లభించిందంటూ భావోద్వేగం చెందింది.

ఒక ఇంటర్వ్యూలో ఈ అంశంపై జాన్వీకపూర్‌ మాట్లాడుతూ.. ‘గుడ్‌ లక్‌ జెర్రీ సినిమాపై నయనతార సానుకూలంగా స్పందించారని చదివా. ఆమె ఫోన్‌ నంబరు తెలుసుకుని సంతోషం వ్యక్తం చేస్తూ ఆమెకు మెసేజ్‌ పంపాను. దానికి లేడీ సూపర్‌స్టార్‌ నుంచి రిప్లై వచ్చింది. ‘కెరీర్‌ ప్రారంభంలోనే నటనకు ప్రాధాన్యం ఉన్న పాత్రను నువ్వు పోషించినందుకు గర్విస్తున్నా. అభినందనలు’ అంటూ నయనతార రిప్లై ఇచ్చారని జాన్వీ వెల్లడించింది. ‘అంత పెద్ద నటి అభినందించడం నాకు బాగా నచ్చింది. ఈ ప్రశంస నాకు ప్రత్యేకమైంద’ని జాన్వీ భావోద్వేగం చెందింది.