ShahRukh Khan: ట్విటర్‌ ట్రెండింగ్‌లో ‘గెట్‌ వెల్‌ సూన్‌ షారుఖ్‌’.. ఎందుకంటే..?

ముంబయి: బాలీవుడ్‌ స్టార్‌ హీరో షారుఖ్‌ ఖాన్‌ కొవిడ్‌ బారినపడ్డారు. స్వల్ప లక్షణాలు కనిపించడంతో పరీక్షలు చేయించుకోగా ఆయనకు కరోనా ఉన్నట్లు వైద్యులు గుర్తించారు. ప్రస్తుతం ఆయన వైద్యుల సూచనలు పాటిస్తూ క్వారంటైన్‌లో ఉన్నారు. షారుఖ్‌ ఖాన్‌ కరోనా బారిన పడ్డారంటూ క్రికెటర్‌ హర్భజన్‌ సింగ్‌ ట్వీట్ చేశారు. ‘షారుఖ్‌.. కరోనా నుంచి మీరు త్వరగా కోలుకోవాలని ప్రార్థిస్తున్నా’ అని  ట్వీట్‌ చేశారు. ఈ నేపథ్యంలో ఆయన అభిమానులు కలవరపాటుకు గురవుతున్నారు. ‘గెట్‌ వెల్‌ సూన్‌ ఎస్‌ఆర్‌కే’ అనే హ్యాష్‌ట్యాగ్‌ జత చేస్తూ వరుస పోస్టులు పెడుతున్నారు. మరోవైపు, ఇటీవల బాలీవుడ్‌ అగ్ర నిర్మాత కరణ్‌జోహార్‌ ఇచ్చిన బర్త్‌డే పార్టీలో షారుఖ్‌తోపాటు బాలీవుడ్‌ సెలబ్రిటీలు పాల్గొన్నారు. ఈ పార్టీలో పాల్గొన్న చాలామంది తారలు కరోనా బారిన పడ్డారంటూ ఆదివారం ఉదయం నుంచి పలు ఆంగ్ల పత్రికల్లో వార్తలు వస్తున్నాయి.