Shahrukh Khan: షారుఖ్ డంకీ

సామాజిక అంశాలే ఇతివృత్తం చేసుకొని మనసుకు హత్తుకునేలా చిత్రాలు తెరకెక్కించే దర్శకుడు రాజ్‌ కుమార్‌ హిరాణి. బాలీవుడ్‌ బాద్‌షా షారుఖ్‌ఖాన్‌ కథానాయకుడిగా ఆయన నుంచి ఓ సినిమా రానుందనే సంగతి తెలిసిందే. తాజాగా ఆ చిత్ర టైటిల్‌ను ‘డంకీ’గా ప్రకటించారు. ఈ సందర్భంగా షారుఖ్‌, హిరాణి మాట్లాడుకుంటున్న వీడియోను విడుదల చేశారు. సంజూకి ‘మున్నాభాయ్‌’, అమీర్‌కి ‘పీకే’ మరి నాకేంటి అని షారుఖ్‌ అడుగుతాడు. నువ్వు ‘డంకీ’ అని హిరాణి అనడంతో ప్రోమో ముగుస్తుంది. వీరిద్దరి కలయికలో రానున్న తొలి చిత్రం ఇదే. ఇందులో షారుఖ్‌కు జోడీగా తాప్సీ పన్నూ నటించనుంది. క్రిస్మస్‌ కానుకగా 2023 డిసెంబరు 22న ఈ చిత్రాన్ని విడుదల చేస్తామని చిత్రబృందం ప్రకటించింది. జియో స్టూడియోస్‌, రెడ్‌ చిల్లీస్‌ ఎంటర్‌టైన్‌మెంట్స్‌, రాజ్‌కుమార్‌ హిరాణి ఫిల్మ్స్‌ సంస్థలు ఈ చిత్రాన్ని నిర్మిస్తున్నాయి.