జనాభాలో హిందువుల వాటా తగ్గుదల

2015 నాటికి 78.06%కు పరిమితం
1950తో పోలిస్తే వారి వర్గంలో 7.82% క్షీణత
అదే సమయంలో ముస్లింల వాటాలో 43.15% పెరుగుదల
ప్రధానమంత్రి ఆర్థిక సలహా మండలి నివేదికలో వెల్లడి

దిల్లీ: భారత జనాభాలో హిందువుల శాతం క్రమంగా తగ్గుతోందని ప్రధానమంత్రి ఆర్థిక సలహా మండలి (ఈఏసీ-పీఎం) తెలిపింది. 1950లో మన దేశంలో 84.68%గా ఉన్న ఈ మెజార్టీ వర్గం వాటా.. 2015 నాటికి 78.06%కు క్షీణించిందని వెల్లడించింది. అంటే హిందువుల వాటాలో 7.82% తగ్గుదల నమోదైందని పేర్కొంది. అదే సమయంలో ముస్లింల వాటా 9.84% నుంచి 14.09%కు పెరిగినట్లు తెలియజేసింది. వారి వాటాలో పెరుగుదల 43.15%గా నమోదైనట్లు వివరించింది. 1950-2015 మధ్య క్రైస్తవులు, సిక్కుల వాటా స్వల్పంగా పెరిగిందని.. జైనులు, పార్శీల శాతం తగ్గిందని వెల్లడించింది. సమాజంలో భిన్నత్వాన్ని పెంపొందించేందుకు వీలుగా ఉన్న అనుకూల వాతావరణాన్ని ఈ మార్పులు సూచిస్తున్నాయని సలహా మండలి అభిప్రాయపడింది. విధానపరమైన చర్యలు, రాజకీయ నిర్ణయాలు, సామాజిక ప్రక్రియల ఫలితంగా ఈ మార్పులు చోటుచేసుకున్నాయని తెలిపింది. శామికా రవి నేతృత్వంలోని ఈఏసీ-పీఎం ప్రపంచవ్యాప్తంగా 167 దేశాల్లో పరిస్థితులను అధ్యయనం చేసి ఈ మేరకు నివేదికను రూపొందించింది. ఆయా వర్గాల జనాభా నిర్దిష్టంగా ఎంత ఉందన్నది మాత్రం అందులో తెలియజేయలేదు.

పొరుగున మెజార్టీ మతస్థుల పెరుగుదల

తాజా నివేదిక ప్రకారం- దక్షిణాసియాలోని బంగ్లాదేశ్‌, పాకిస్థాన్‌, శ్రీలంక, భూటాన్‌, అఫ్గానిస్థాన్‌ వంటి భారత పొరుగు దేశాల్లో మాత్రం మెజార్టీ మతస్థుల వాటా పెరుగుతోంది. వాటిలో మైనార్టీల వాటా ఆందోళనకర రీతిలో తగ్గుతోంది. 1950-2015 మధ్య మాల్దీవులు మినహా అన్ని ముస్లిం మెజార్టీ దేశాల్లోనూ మెజార్టీ వర్గం ప్రజల వాటా పెరిగింది. మాల్దీవుల్లో మెజార్టీ వర్గంగా ఉన్న షఫీ సున్నీల వాటా 1.47% తగ్గింది. బంగ్లాదేశ్‌లో మెజార్టీ మతస్థుల వాటా 18% అధికంగా నమోదైంది. భారత ఉపఖండంలో ఇదే అత్యధిక పెరుగుదల. పాకిస్థాన్‌లో మెజార్టీ వర్గమైన హనాఫీ ముస్లింల వాటా 3.75% పెరిగింది. మొత్తంగా ఆ దేశ జనాభాలో ముస్లింల వాటా పరంగా 10% పెరుగుదల నమోదైంది. ముస్లిమేతరులు మెజార్టీ వర్గాలుగా ఉన్న దేశాల్లో.. మయన్మార్‌, భారత్‌, నేపాల్‌లలో మెజార్టీ మతస్థుల వాటా తగ్గింది. 35 అధికాదాయ ఓఈసీడీ దేశాల్లో మెజార్టీ మతస్థుల వాటా సగటున 29% క్షీణించింది. ప్రపంచ సగటు (22%) తో పోలిస్తే ఇది ఎక్కువ.