Valimai: రయ్‌.. రయ్‌.. ‘వాలిమై’

తమిళ అగ్ర కథా  నాయకుడు అజిత్‌ నటించిన యాక్షన్‌ ఎంటర్‌టైనర్‌ ‘వాలిమై’. హెచ్‌.వినోద్‌ తెరకెక్కించారు. బోనీ కపూర్‌ నిర్మాత. తెలుగు యువ హీరో కార్తికేయ ప్రతినాయకుడిగా నటించారు. నిర్మాణాంతర పనుల్లో ఉన్న ఈ సినిమా, సంక్రాంతి     సందర్భంగా జనవరిలో ప్రేక్షకుల ముందుకు రానుంది. ఇందులో భాగంగా తాజాగా మేకింగ్‌ వీడియోను విడుదల చేశారు. సినిమాలో యాక్షన్‌ హంగామా ఏ స్థాయిలో ఉండనుందన్నది ఈ ప్రచార చిత్రంతో కాస్త రుచి చూపించే ప్రయత్నం చేశారు. అజిత్‌ యాక్షన్‌ సీక్వెన్స్‌లు, బైక్‌ చేజింగ్‌ సన్నివేశాలు ఆసక్తికరంగా ఉన్నాయి. కార్తికేయ విభిన్నమైన లుక్‌లో కనిపించారు. ఓ బైక్‌ ఛేజింగ్‌ సన్నివేశంలో అజిత్‌ అదుపుతప్పి కిందపడిపోవడాన్ని మేకింగ్‌ వీడియోలో చూపించారు. ఆ సీన్‌లో ఆయనకు స్వల్ప గాయాలైనట్లు కనిపించినా.. వెంటనే లేచి ఆ ఫీట్‌ను విజయవంతంగా పూర్తి చేయడం ఆకట్టుకుంది. ఇందులో అజిత్‌ సీబీసీఐడీ అధికారిగా కనిపించనున్నారు. ఆయనకు జోడీగా హ్యూమా ఖురేషి నటించింది. ఈ సినిమాని తెలుగులోనూ విడుదల చేయనున్నట్లు ప్రచారం వినిపిస్తోంది. దీనికి సంగీతం: యువన్‌ శంకర్‌ రాజా, ఛాయాగ్రహణం: నీరవ్‌ షా.