కేసీఆర్‌ అసత్యాలు ప్రచారం చేస్తున్నారు: లక్ష్మణ్‌

హైదరాబాద్‌: రాష్ట్రానికి కేంద్రం పెద్ద ఎత్తున నిధులు కేటాయిస్తూ అన్ని రంగాల్లో సహకరిస్తున్నప్పటికీ సీఎం కేసీఆర్‌ అసత్యాలు ప్రచారం చేస్తున్నారని ఓబీసీ మోర్చా జాతీయ అధ్యక్షుడు లక్ష్మణ్‌ విమర్శించారు. నాంపల్లిలోని భాజపా కార్యాలయంలో లక్ష్మణ్‌ మీడియాతో మాట్లాడారు. దోచుకోవడానికి అవకాశం లేకుండా పోతుందని.. నూతన విద్యుత్‌ బిల్లుపై దష్ప్రచారం చేస్తున్నారని ఆరోపించారు. కేంద్రం వాటా కింద ఇప్పటివరకు రూ.70 వేల కోట్లు తెలంగాణకు కేటాయించిందన్నారు. కేంద్ర సర్కార్‌ నుంచి పంచాయతీలు, మున్సిపాలిటీలకు నిధులు రాలేదా? అని ప్రశ్నించారు. సీఎం కేసీఆర్‌ కనీస అవగాహన లేకుండా నిరాశ, నిస్ఫృహతో కేంద్రపై విమర్శలు చేస్తున్నారని మండిపడ్డారు. కేంద్రం ఇచ్చిన నిధులపై శ్వేతపత్రం విడుదల చేయాలని లక్ష్మణ్‌ డిమాండ్‌ చేశారు. వ్యవసాయాన్ని లాభసాటిగా మార్చాలనే సంకల్పంతో తీసుకొచ్చిన నూతన వ్యవసాయం చట్టంపై సీఎం కేసీఆర్‌ తప్పుడు ప్రచారం చేస్తున్నారని మండిపడ్డారు. రైతులు తమ పంటను నచ్చిన చోట అమ్ముకునే స్వేచ్ఛను కల్పిస్తూ కేంద్రం బిల్లు తెస్తే.. తమకు అనుయాయులుగా ఉన్న దళారులకు నష్టం కలుగుతుందనే కారణంతో అనవసర విమర్శలు చేస్తున్నారని దుయ్యబట్టారు.