BJP: రామగుండంలో ప్రధాని మోదీ బహిరంగ సభ.. భారీ జనసమీకరణకు భాజపా ప్లాన్‌

హైదరాబాద్‌: ప్రధానమంత్రి నరేంద్రమోదీ ఈనెల 12న రాష్ట్రానికి రానున్న నేపథ్యంలో రామగుండం పారిశ్రామిక ప్రాంతంలో భారీ బహిరంగ సభ నిర్వహించాలని భాజపా నిర్ణయించింది. కనీవినీ ఎరుగని రీతిలో భారీగా జన సమీకరణ చేసేందుకు సిద్ధమైంది. కనీసం లక్షమందికి తగ్గకుండా బహిరంగసభను విజయవంతం చేయాలని భావిస్తోంది. ఈ సందర్భంగా చేపట్టాల్సిన కార్యక్రమాలు, జనసమీకరణపై పార్టీ రాష్ట్ర అధ్యక్షుడు బండి సంజయ్‌ అధ్యక్షతన ఉమ్మడి ఆదిలాబాద్‌, ఉమ్మడి వరంగల్‌, ఉమ్మడి కరీంనగర్‌ జిల్లాల నేతలతో రాష్ట్ర పార్టీ కార్యాలయంలో సన్నాహక సమావేశం నిర్వహించారు. 

ప్రధానికి ఘన స్వాగతం పలికేలా తెలంగాణ అంతటా వివిధ రూపాల్లో అలంకరణ చేయాలని, అన్ని నియోజకవర్గాల రైతులు, కార్యకర్తలు తరలివచ్చేలా ర్యాలీలు నిర్వహించాలని సంజయ్‌ పేర్కొన్నారు. ప్రధానంగా రూ.6,120 కోట్లతో రామగుండం ఎరువుల కర్మాగారాన్ని పునరుద్ధరించడం వల్ల రైతులకు కలిగే ప్రయోజనాలను వివరించాలన్నారు. రామగుండం ఎరువుల కర్మాగారం పునరుద్ధరణ ద్వారా తెలంగాణ, ఏపీ సహా దక్షిణ భారత రైతులందరికీ కొరత లేకుండా ఎరువులను సరఫరా చేయబోతున్నారని అవగాహన కల్పించాలని తెలిపారు. ఈ సమావేశానికి బండి సంజయ్‌తో పాటు ఎంపీ సోయం బాపూరావు, ఈటల రాజేందర్‌, జి.వివేక్‌, జి.విజయరామారావు, సుద్దాల దేవయ్య, గుజ్జుల ప్రేమేందర్‌రెడ్డి, దుగ్యాల ప్రదీప్‌ కుమార్‌ తదితరులు హాజరయ్యారు.