నెలకు రూ.9 వేల కోట్ల సంపద సృష్టించలేక అప్పులపాలు

తెదేపా అధికార ప్రతినిధి నీలాయపాలెం విజయ్‌కుమార్‌ ధ్వజం

ఈనాడు డిజిటల్‌, అమరావతి: ప్రతి నెల రూ.9 వేల కోట్ల సంపద సృష్టించడం చేతకాని సీఎం జగన్‌.. రాష్ట్రాన్ని అప్పులపాలు చేశారని తెదేపా అధికార ప్రతినిధి నీలాయపాలెం విజయ్‌కుమార్‌ ధ్వజమెత్తారు. అప్పుల కోసం తప్పుడు లెక్కలతో జీఎస్‌డీపీని పెంచారని విమర్శించారు. తెదేపా ప్రభుత్వంలో రాష్ట్ర సొంత ఆదాయ వృద్ధి 98 శాతం ఉంటే.. జగన్‌ పాలనలో 66 శాతానికి పరిమితమైందన్నారు. పన్నుల ఆదాయంలో గత ప్రభుత్వం 119 శాతం వృద్ధి సాధిస్తే.. నేడు 47.5 శాతానికి తగ్గిందని తెలిపారు. మంగళగిరిలోని తెదేపా కేంద్ర కార్యాలయంలో సోమవారం ఆయన విలేకరులతో మాట్లాడారు. ‘మద్యనిషేధం చేసిన తర్వాతే ఓట్లడుగుతానన్న జగన్‌రెడ్డి పాలనలో మద్యం ఆదాయం గణనీయంగా పెరిగింది. గతంలో రూ.72 వేల కోట్లు ఉన్న మద్యం ఆదాయం.. ప్రస్తుతం రూ.1.22 లక్షల కోట్లకు చేరింది’ అని విజయ్‌కుమార్‌ పేర్కొన్నారు.