Telangana News: ఆ పని చేస్తే రోజుకొకరి బండారం బయటపెడతా: జగ్గారెడ్డి

హైదరాబాద్‌: తమకు పార్టీ షోకాజ్‌ నోటీస్‌ ఇస్తే సమాధానం చెబుతామని.. సస్పెండ్‌ చేసే దమ్ము ఎవరికీ లేదని కాంగ్రెస్‌ ఎమ్మెల్యే జగ్గారెడ్డి అన్నారు. తనను సస్పెండ్‌ చేస్తే రోజుకొకరి బండారం బయటపెడతానని హెచ్చరించారు. అశోక హోటల్‌లో కాంగ్రెస్‌ సీనియర్‌ నేతల ‘ప్రత్యేక’ భేటీ ముగిసిన అనంతరం జగ్గారెడ్డి మీడియాతో మాట్లాడారు.

‘‘సస్పెండ్‌ చేసినా అధిష్ఠానానికి విధేయుడిగా ఉంటా. రేవంత్‌ నా సవాలు స్వీకరిస్తే నేను రాజీనామా చేస్తా. నా స్థానంలో అభ్యర్థిని పెట్టి గెలిపించుకుంటే రేవంత్‌ హీరో అని ఒప్పుకుంటా. నేను గెలిస్తే నేను హీరో, ఇద్దరం ఓడితే ఇద్దరం జీరోలమే. పార్టీ సిద్ధాంతంలో రేవంత్‌ పని చేయడం లేదు. వీహెచ్‌ తన కూతురు సమస్యపై హరీశ్‌రావును కలిస్తే తప్పేంటి?’’ అని జగ్గారెడ్డి నిలదీశారు. అంతకుముందు సమావేశం వద్దకు కాంగ్రెస్‌ నేతలు మానవతారాయ్‌, అద్దంకి దయాకర్‌, బెల్లయ్య నాయక్‌ వెళ్లగా అక్కడి నుంచి వెళ్లిపోవాలని జగ్గారెడ్డి వారికి సూచించారు. దీంతో ఆ ముగ్గురూ వెళ్లిపోయారు.