ఆర్జీవీకి దమ్ముంటే తెదేపా నిర్మించిన ప్రాజెక్టులపై సినిమా తీయాలి: దేవినేని సవాల్‌

విజయవాడ: ఇబ్రహీంపట్నం పవిత్ర సంగమం వద్ద దర్శకుడు రామ్‌గోపాల్‌ వర్మ షూటింగ్‌ తీయడంపై తెదేపా నేత, మాజీ మంత్రి దేవినేని ఉమ అభ్యంతరం వ్యక్తం చేశారు. పవిత్ర సంగమం వద్ద ఆయన ప్రత్యేక పూజలు నిర్వహించి జలహారతి ఇచ్చారు. ఈ సందర్భంగా మాట్లాడుతూ.. ‘‘పట్టిసీమ పథకం దండగని ప్రచారం చేసిన వైకాపా నాయకులు ఇవాళ ఏ మొహం పెట్టుకొని సినిమా షూటింగ్‌లు చేయిస్తున్నారు. అధికారంలోకి వచ్చిన 9 నెలల్లోనే పట్టిసీమ పూర్తి చేసి 13 లక్షల ఎకరాలకు నీరు ఇచ్చిన ఘనత తెదేపాది. మళ్లీ మేం అధికారంలోకి రాగానే వైకాపా ప్రభుత్వం నిర్వీర్యం చేసిన ఇరిగేషన్ ప్రాజెక్టులను తిరిగి నిర్మిస్తాం. ప్రాజెక్టులపై తెదేపా అధినేత చంద్రబాబు ఇచ్చిన పవర్ పాయింట్ ప్రజంటేషన్‌లను ప్రపంచ వ్యాప్తంగా కోట్లాది మంది తిలకించారు. ఆర్జీవీకి దమ్ముంటే తెదేపా నిర్మించిన ప్రాజెక్టులపై సినిమా తీయాలి’’ అని దేవినేని ఉమ సవాల్‌ విసిరారు.