పేదలకు అందని ద్రాక్షలా విద్య, వైద్యం

జోడో యాత్రలో భట్టి విక్రమార్క విమర్శ

బెల్లంపల్లి గ్రామీణం, న్యూస్‌టుడే: భారాస పాలనలో పేదలకు విద్య, వైద్యం అందని ద్రాక్షలా మారాయని సీఎల్పీ నేత భట్టి విక్రమార్క విమర్శించారు. మంచిర్యాల జిల్లా బెల్లంపల్లిలో శుక్రవారం నిర్వహించిన హాథ్‌ సే హాథ్‌ జోడో యాత్ర సందర్భంగా ప్రభుత్వ డిగ్రీ కళాశాల విద్యార్థులతో ఆయన మాట్లాడారు. ప్రభుత్వ విద్యను పటిష్ఠం చేయాల్సిన యంత్రాంగం, మౌలిక వసతుల కల్పనపై చిన్నచూపు చూస్తోందన్నారు. బెల్లంపల్లి డిగ్రీ కళాశాలలో 800 మంది విద్యార్థినీ విద్యార్థులు చదువుతున్నా.. సరిపడినన్ని మరుగుదొడ్లు లేకపోవడం ప్రభుత్వ వైఫల్యమేనన్నారు. ప్రతిపక్ష నాయకుడి హోదాలో బెల్లంపల్లి సాంఘిక సంక్షేమ బాలుర గురుకుల పాఠశాలకు వస్తే గేట్లు తీయకపోవడం విడ్డూరంగా ఉందన్నారు. ఈ కార్యక్రమంలో మంచిర్యాల డీసీసీ అధ్యక్షురాలు సురేఖ తదితరులు పాల్గొన్నారు.