కర్ణాటక కాంగ్రెస్‌ ఎన్నికల పరిశీలకులుగా తెలుగు నాయకులు

ఏపీ, తెలంగాణల నుంచి నియామకం

ఈనాడు, దిల్లీ: కర్ణాటకలో మే 10న జరగబోయే శాసనసభ ఎన్నికలకు కాంగ్రెస్‌ పార్టీ కార్యకలాపాలను పర్యవేక్షించడానికి ఏఐసీసీ శుక్రవారం 66 మంది పర్యవేక్షకులను నియమించింది. ఇందులో అయిదుగురు బెంగుళూరు నగరానికి, మిగిలినవారు వివిధ అసెంబ్లీ నియోజకవర్గాలకు ఎన్నికల కార్యకలాపాలను పర్యవేక్షిస్తారని పార్టీ సంస్థాగత వ్యవహారాల ఇన్‌ఛార్జి కేసీ వేణుగోపాల్‌ శుక్రవారం రాత్రి జారీచేసిన ఉత్తర్వుల్లో పేర్కొన్నారు. ఇందులో బెంగుళూరు నగర పర్యవేక్షకుడిగా ఏపీసీసీ మాజీ అధ్యక్షుడు ఎన్‌.రఘువీరారెడ్డి నియమితులయ్యారు. వివిధ అసెంబ్లీ స్థాయి పరిశీలకులుగా బెల్లయ్య నాయక్‌ తెజావత్‌, జేడీ శీలం, మల్లు రవి, షేక్‌ మస్తాన్‌ వలీ, ఎస్‌ఏ సంపత్‌కుమార్‌, సాకే శైలజానాథ్‌, సీతక్క నియమితులయ్యారు.