కావాలనే నాపై దుష్ప్రచారం: వైకాపా ఎమ్మెల్యే వసంత కృష్ణప్రసాద్‌

మైలవరం, న్యూస్‌టుడే: శాసనసభ సభ్యత్వానికి, వైకాపాకు ఎన్టీఆర్‌ జిల్లా మైలవరం ఎమ్మెల్యే వసంత కృష్ణప్రసాద్‌ రాజీనామా చేశారంటూ సామాజిక మాధ్యమాల్లో సోమవారం గట్టి ప్రచారం జరిగింది. దీనిపై జి.కొండూరు పర్యటనలో ఉన్న ఎమ్మెల్యేను న్యూస్‌టుడే సంప్రదించగా తాను రాజీనామా చేసినట్లు జరుగుతున్న ప్రచారాన్ని ఆయన తీవ్రంగా ఖండించారు. ఇందులో ఏ మాత్రం వాస్తవం లేదని, ఆ ప్రచారంతో తనకు సంబంధం లేదన్నారు. కొంతమంది కావాలనే దుష్ప్రచారం చేస్తున్నారన్నారు. నియోజకవర్గంలో సోమవారం జరిగిన పలు కార్యక్రమాల్లో పాల్గొన్నానని, లంక భూములకు పట్టాలు పంచానని ఎమ్మెల్యే వివరించారు. తనపై జరుగుతున్న దుష్ప్రచారాన్ని పార్టీ శ్రేణులు తిప్పికొట్టాలని ఆయన ఒక ప్రకటనలో కోరారు.