బలహీనవర్గాలకు భాజపా వ్యతిరేకం

మంత్రి పొన్నం ప్రభాకర్‌

హైదరాబాద్‌, న్యూస్‌టుడే: భాజపా మ్యానిఫెస్టోలోని 14 అంశాల్లో బీసీలకు ఒక్క హామీ లేకపోవడం శోచనీయమని, అది బలహీనవర్గాల వ్యతిరేక పార్టీ అని మంత్రి పొన్నం ప్రభాకర్‌ సోమవారం ఒక ప్రకటనలో విమర్శించారు. కాంగ్రెస్‌ పార్టీ ‘పాంచ్‌ న్యాయ్‌’లో బలహీనవర్గాలకు పెద్దపీట వేసిందని, కులగణన సర్వే చేయడానికి సిద్ధంగా ఉన్నామని అందులో స్పష్టం చేసిందని పేర్కొన్నారు. దేశంలోని బడుగు బలహీనవర్గాలంతా ఈ విషయాలను గమనించాలని కోరారు. అలాగే తెలంగాణ చేనేత రంగాన్ని కాపాడాలని, నూలు ఉత్పత్తులను ప్రోత్సహించాలని విజ్ఞప్తి చేశారు. అతిథులకు, పెద్దలకు మర్యాద చేయాలనుకుంటే కాటన్‌ టవళ్లను కప్పాలన్నారు. ఇవైతే ఇంటి అవసరాలకైనా ఉపయోగపడతాయని, శాలువాలు ఎందుకూ పనికి రావని పేర్కొన్నారు. లేదంటే పిల్లలకు ఉపయోగపడే పుస్తకాలు, పెన్నులు ఇవ్వాలని మంత్రి కోరారు.