ప్రభుత్వాన్ని టచ్‌ చేస్తే.. తెలంగాణభవన్‌ పునాదులు లేకుండా చేస్తాం

30 మంది భారాస ఎమ్మెల్యేలు వస్తామంటున్నా మేమే వద్దంటున్నాం
మంత్రి కోమటిరెడ్డి వెంకట్‌రెడ్డి

నల్గొండ జిల్లా పరిషత్తు, న్యూస్‌టుడే: కాంగ్రెస్‌ ప్రభుత్వాన్ని కూల్చాలనే భావనతో.. పార్టీని టచ్‌ చేయాలని చూస్తే హైదరాబాద్‌లో భారాస కార్యాలయం తెలంగాణభవన్‌ పునాదులు లేకుండా చేస్తామని రోడ్లు భవనాలశాఖ మంత్రి కోమటిరెడ్డి వెంకట్‌రెడ్డి హెచ్చరించారు. బుధవారం నల్గొండలోని క్యాంపు కార్యాలయంలో ఆయన విలేకరులతో మాట్లాడారు. కాంగ్రెస్‌ ప్రభుత్వం ఏడాది కూడా ఉండదంటూ మాజీ సీఎం కేసీఆర్‌ మాట్లాడటం హాస్యాస్పదంగా ఉందన్నారు. పదేళ్లు రాష్ట్రాన్ని దోపిడీ చేసిన నిధులతో తమ పార్టీ ఎమ్మెల్యేలను కొనాలని చూస్తున్నారా.. అని ప్రశ్నించారు. భారాసకు చెందిన 30 మంది ఎమ్మెల్యేలు కాంగ్రెస్‌లో చేరుతామన్నా.. తామే వద్దంటున్నామని చెప్పారు. కాంగ్రెస్‌ తలుపులు తెరిస్తే భారాసలో తొమ్మిది మంది ఎమ్మెల్యేలు కూడా ఉండరని పేర్కొన్నారు. సీఎం రేవంత్‌రెడ్డిని విమర్శించే నైతిక హక్కు కేసీఆర్‌కు లేదన్నారు. అవినీతి కేసుల్లో ఎమ్మెల్సీ కవిత జైలుకుపోయినప్పటి నుంచి కేసీఆర్‌ మతి లేకుండా మాట్లాడుతున్నారని ఆరోపించారు. కేసీఆర్‌ కుటుంబానికి సరిపోయే విధంగా రెండు పడక గదుల ఇల్లు చర్లపల్లి జైలులో కట్టిస్తామన్నారు. లోక్‌సభ ఎన్నికల్లో రాష్ట్రంలో 13 స్థానాల్లో కాంగ్రెస్‌ విజయం సాధిస్తుందని ధీమా వ్యక్తం చేశారు. భారాసకు ఒక్క సీటు కూడా రాదని జోస్యం చెప్పారు.