BJP: జేపీ నడ్డా నివాసంలో తెలంగాణ భాజపా నేతల కీలక సమావేశం

దిల్లీ: అసెంబ్లీ ఎన్నికల వ్యూహాలు, అభ్యర్థుల ఎంపికపై భాజపా అధిష్ఠానం కీలక కసరత్తు చేస్తోంది. ఈ మేరకు ఆ పార్టీ జాతీయ అధ్యక్షుడు జేపీ నడ్డా నివాసంలో పార్టీ అగ్రనేతలు, తెలంగాణ రాష్ట్ర నాయకత్వం సమావేశమై చర్చించింది. ఈ భేటీకి కేంద్ర హోంశాఖ మంత్రి అమిత్‌ షా కూడా హాజరయ్యారు. భాజపా సంస్థాగత వ్యవహారాల ప్రధాన కార్యదర్శి బీఎల్‌ సంతోష్‌, ఓబీసీ మోర్చా జాతీయ అధ్యక్షుడు లక్ష్మణ్‌, జాతీయ ప్రధాన కార్యదర్శి బండి సంజయ్‌, జాతీయ ఉపాధ్యక్షురాలు డీకే అరుణ, తెలంగాణ వ్యవహారాల బాధ్యులు సునీల్‌ భన్సల్‌, తరుణ్‌ చుగ్‌, ఎన్నికల ఇన్‌ఛార్జి ప్రకాశ్‌ జావడేకర్‌ సమావేశంలో పాల్గొన్నారు. ప్రచార సరళిని ముమ్మరం చేయడంతో పాటు, అభ్యర్థుల ఎంపికపై ప్రధానంగా చర్చ జరిగింది. శుక్రవారం భాజపా కేంద్ర ఎన్నికల కమిటీ భేటీ కానున్న నేపథ్యంలో సమావేశానికి ప్రాధాన్యత సంతరించుకుంది.