Kishan Reddy: కాంగ్రెస్ పార్టీకి ముందుంది ముసళ్ల పండగ: కిషన్‌రెడ్డి

హైదరాబాద్‌: కాంగ్రెస్‌ పార్టీ ఎప్పుడూ జాతీయ దృక్పథంతో వ్యవహరించలేదని కేంద్ర మంత్రి, భాజపా రాష్ట్ర అధ్యక్షుడు కిషన్‌రెడ్డి విమర్శించారు. భాజపా రాష్ట్ర కార్యాలయంలో ఏర్పాటు చేసిన మీడియా సమావేశంలో ఆయన మాట్లాడారు.

‘‘ధార్మిక కార్యక్రమాన్ని కాంగ్రెస్‌ పార్టీ బహిష్కరిస్తోంది. ఆ పార్టీ.. హిందూ వ్యతిరేక ధోరణి ఏ విధంగా ఉందో అర్థమవుతోంది. రామమందిర ప్రాణప్రతిష్ఠ జరుగుతుంటే వారికి కంటగింపుగా ఉంది. దేశంలో రోజు రోజుకూ ఆధ్యాత్మికత పెరుగుతోంది. అయోధ్యకు రావడం లేదని కాంగ్రెస్‌ పార్టీ చెప్పడం.. రాజకీయ దృక్పథంతో తీసుకున్న నిర్ణయమే. ఆ పార్టీ ఓటు బ్యాంకు, బుజ్జగింపు రాజకీయాలకు పాల్పడుతోంది. సరయూ నదిలో ప్రాణాలు కోల్పోయిన అమరుల ఆత్మలకు 22న శాంతి చేకూరుతుంది. జీ20, పార్లమెంట్‌, అఖిలపక్షం, ఎన్నికల కమిషన్‌ సమావేశాలను కాంగ్రెస్ పార్టీ బహిష్కరించింది. ఇలా చేయడం వారికి అలవాటుగా మారింది. ఆ పార్టీకి ముందుంది ముసళ్ల పండగ’’ అని వ్యాఖ్యానించారు.