Nadendla Manohar: నవంబరు 1 నాటికి తెదేపా, జనసేన ఉమ్మడి మేనిఫెస్టో: నాదెండ్ల మనోహర్‌

అమరావతి: రాజమహేంద్రవరంలో జరిగిన జనసేన-తెదేపా సమన్వయ సమావేశంలో తీసుకున్న నిర్ణయాలను అమలు చేయటంలో మరో ముందడుగు పడింది. రాష్ట్రస్థాయిలో పొత్తును క్షేత్రస్థాయిలో బలోపేతం చేసేందుకు అక్టోబరు 29, 30, 31వ తేదీల్లో జిల్లా స్థాయిలో ఇరు పార్టీల సమన్వయ సమావేశాలు ఏర్పాటు చేయాలని నిర్ణయించారు. ఈ మేరకు జిల్లా కన్వీనర్లతో జనసేన రాజకీయ వ్యవహారాల కమిటీ ఛైర్మన్‌ నాదెండ్ల మనోహర్‌ టెలికాన్ఫరెన్స్‌ నిర్వహించి దిశానిర్దేశం చేశారు. ఈనెల 29 నుంచి 3రోజుల్లో అన్ని జిల్లాల్లో సమావేశాలు నిర్వహించి ఉమ్మడి పోరాట కార్యాచరణ ఖరారు చేయాలన్నారు. పొత్తుని విచ్ఛిన్నం చేసేందుకు వైకాపా పన్నే ఉచ్చులో పడొద్దని జనసేన నేతలకు నాదెండ్ల సూచించారు.

సమన్వయ సమావేశాల్లో చర్చించాల్సిన అంశాలపై దిశానిర్దేశం చేశారు. సహృద్భావ వాతావరణంలో సమావేశాలు జరగాలన్నారు. భవిష్యత్తు ప్రజా పోరాటాలు, ఆందోళనల్లో కలిసికట్టుగా ముందుకు వెళ్లేలా కార్యాచరణ రూపొందించుకోవాలని సూచించారు. జనసేన పార్టీ షణ్ముఖ వ్యూహంతో పాటు తెదేపా సూపర్ సిక్స్‌లో ప్రకటించిన అంశాలను కలిపి ఉమ్మడి మేనిఫెస్టో రూపొందిస్తున్నట్లు తెలిపారు. నవంబర్ 1వ తేదీ నాటికి ఉమ్మడి మేనిఫెస్టో సిద్ధం అవుతుందని నాదెండ్ల తెలిపారు.