Revanth Reddy: తెరాస ఒత్తిడితోనే రాహుల్‌ పర్యటనకు అనుమతి నిరాకరణ: రేవంత్‌

హైదరాబాద్‌: తెలంగాణ ఉద్యమానికి కారణమైన ఉస్మానియా యూనివర్సిటీ(ఓయూ)లో సమస్యలు, విద్యార్థుల ఇబ్బందులను తెలుసుకోవాలని కాంగ్రెస్‌ అగ్రనేత రాహుల్‌గాంధీ ఆలోచన చేశారని టీపీసీసీ అధ్యక్షుడు రేవంత్‌రెడ్డి అన్నారు. ఓయూలో రాహుల్‌ పర్యటనకు అనుమతి కోసం తమ పార్టీ నేతలు వీసీని కలిశారని.. అధికార తెరాస ఒత్తిడితో అనుమతి నిరాకరించారని ఆరోపించారు. చంచల్‌గూడ జైలులో ఎన్‌ఎస్‌యూఐ విద్యార్థులతో ములాఖత్‌ అనంతరం రేవంత్‌ మీడియాతో మాట్లాడారు. 

తెలంగాణ రాష్ట్రం ఏర్పాటుకు కారణమైన రాహుల్‌గాంధీ పర్యటనకు వీసీ అనుమతివ్వకపోవడం దుర్మార్గమని రేవంత్‌ విమర్శించారు. రాహుల్‌ పర్యటన అనుమతి కోసం ఎన్‌ఎస్‌యూఐ అధ్యక్షుడు వెంకట్‌ ఓయూకి వెళ్లారని.. ఆయనపై అక్రమ కేసులు పెట్టి జైల్లో పెట్టారని ఆరోపించారు. విద్యార్థులు, నిరుద్యోగులు, అమరవీరుల కుటుంబాల సమస్యలు తీర్చే వరకు కాంగ్రెస్‌ పార్టీ పోరాడుతుందని రేవంత్‌ చెప్పారు.