Andhra News: గుడివాడ ‘క్యాసినో’పై విచారణ జరపండి: ఈడీకి తెదేపా ఫిర్యాదు

దిల్లీ: సంక్రాంతి సందర్భంగా ఏపీలోని గుడివాడలో క్యాసినో నిర్వహించిన తీరుపై దిల్లీలోని ఈడీ డైరెక్టర్‌కు తెదేపా నేతలు ఫిర్యాదు చేశారు. ఎంపీ రామ్మోహన్‌నాయుడు, మాజీ మంత్రి ఆలపాటి రాజేంద్రప్రసాద్‌ తదితరులు ఈడీ అధికారులను కలిశారు. క్యాసినో వ్యవహారంపై విచారణ జరిపి దోషులను శిక్షించాలని కోరారు. 

ఏపీలో అధికార పార్టీకి చెందిన మంత్రి.. గోవా నుంచి గుడివాడకు యువతులను తీసుకొచ్చి సంప్రదాయాలను నట్టేట ముంచారని నేతలు ఆరోపించారు. దీనిపై ఈడీ విచారణ జరిపితే మరిన్ని నిజాలు బయటపడతాయన్నారు. అరాచక శక్తులకు చెక్‌ పెట్టాల్సిన బాధ్యత కేంద్ర సంస్థలపై ఉందని తెదేపా నేతలు వ్యాఖ్యానించారు.