TS News: దళితబంధుపై తెరాస, భాజపాలవి కపట నాటకాలు: భట్టి

హైదరాబాద్‌: దళితబంధు విషయంలో తెరాస, భాజపాలు కపట నాటకాలు ఆడుతున్నాయని కాంగ్రెస్‌ శాసనసభ పక్షనేత భట్టి విక్రమార్క విమర్శించారు. బడుగు, బలహీన వర్గాలకు భాజపా వ్యతిరేకమన్న భట్టి.. అందుకే ఆ పార్టీ నిర్ణయాలు అలాగే ఉంటాయని వ్యాఖ్యానించారు. ప్రస్తుతం జరుగుతున్న పరిణామాలను ప్రజలు గమనించాలని కోరారు. హుజూరాబాద్‌ ప్రజలు కాంగ్రెస్‌కు ఓటేసి భాజపాకు, తెరాసలకు బుద్ధి చెప్పాలని పిలుపునిచ్చారు. హుజూరాబాద్‌ అసెంబ్లీ నియోజకవర్గంలో ఉపఎన్నిక ముగిసేంత వరకు అక్కడ దళితబంధు పథకం అమలును నిలుపుదల చేయాలని కేంద్ర ఎన్నికల సంఘం నిన్న రాష్ట్ర ప్రభుత్వాన్ని ఆదేశించిన విషయం తెలిసిందే.