Telangana News: తెరాస శ్రేణుల మెరుపు ధర్నా.. స్తంభించిన ట్రాఫిక్‌

హైదరాబాద్‌: తెరాస ఎమ్మెల్యేల కొనుగోలు ఆరోపణలు తెలంగాణలో కలకలం సృష్టిస్తున్నాయి. దిల్లీకి చెందిన వ్యక్తులు హైదరాబాద్‌ నగర శివారు మొయినాబాద్‌లోని ఓ ఫామ్‌హౌజ్‌లో నోట్లకట్టలతో పోలీసులకు చిక్కారు. తెరాసకు చెందిన కొందరు ఎమ్మెల్యేలను కొనుగోలు చేసేందుకు వీరు రంగంలోకి దిగారనే పక్కా సమాచారం అందడంతో పోలీసులు వీరిని పట్టుకున్నారు. ఈ ఘటనతో తెరాస శ్రేణులు చౌటుప్పల్‌లోని విజయవాడ హైవేపై మెరుపు ధర్నా నిర్వహించాయి. మంత్రులు గంగుల కమలాకర్‌, శ్రీనివాస్‌గౌడ్‌, ఇంద్రకరణ్‌రెడ్డి ఇతర తెరాస నేతలు రహదారిపై బైఠాయించారు. తెరాస ఎమ్మెల్యేల కొనుగోలుకు భాజపా కుట్ర చేసిందంటూ మంత్రులు ఆగ్రహం వ్యక్తం చేశారు. ఈ సందర్భంగా భాజపాకు వ్యతిరేకంగా పెద్దఎత్తున నినాదాలు చేశారు. ఫలితంగా చౌటుప్పల్‌లో జాతీయ రహదారిపై కిలో మీటర్లమేర ట్రాఫిక్‌ నిలిచిపోయింది. వాహనదారులు ఇబ్బందులు పడుతున్నారు. ఇక బంజారాహిల్స్‌లోనూ మెయినాబాద్‌ ఘటన పట్ల తెరాస శ్రేణులు ఆందోళన చేపట్టాయి. భాజపాకు వ్యతిరేకంగా  పార్టీ నేతలు, కార్యకర్తలు నినాదాలు చేశారు.