CM KCR: దిల్లీలో తెరాస దీక్ష ప్రారంభం.. వేదికపై కేసీఆర్‌, రాకేశ్‌ టికాయత్‌

దిల్లీ: తెలంగాణలో రైతులు పండించిన ధాన్యాన్ని కేంద్ర ప్రభుత్వమే కొనుగోలు చేయాలనే డిమాండ్‌తో తెరాస సర్కారు దిల్లీలోని తెలంగాణభవన్‌లో దీక్ష చేపట్టింది. సీఎం కేసీఆర్‌ దీక్ష ప్రాంగణానికి చేరుకున్నారు. ఆయన వెంట భారతీయ కిసాన్‌ యూనియన్‌ (బీకేయూ) నేత రాకేశ్‌ టికాయత్‌ ఉన్నారు. అంతకుముందు కేసీఆర్‌.. తెలంగాణ అమరవీరుల స్థూపం, అంబేడ్కర్‌, మహాత్మ జ్యోతిబాపూలే విగ్రహాలకు నివాళులు అర్పించారు. తెలంగాణ తల్లికి పుష్పాలు సమర్పించారు. వేదికపై కేసీఆర్‌, టికాయత్‌లతో పాటు పార్లమెంటరీ పార్టీ నేత కె.కేశవరావు, లోక్‌సభాపక్ష నేత నామా, రైతుబంధు సమితి ఛైర్మన్‌ పల్లా రాజేశ్వర్‌రెడ్డి, మంత్రి నిరంజన్‌రెడ్డి తదితరులు కూర్చున్నారు. 

దీక్షలో మంత్రులు, తెరాస ఎంపీలు, ఎమ్మెల్యేలు పాల్గొన్నారు. వరి ధాన్యం కొనుగోళ్లపై తెరాస కేంద్రానికి అల్టిమేటం ఇవ్వనున్నట్లు సమాచారం. దీక్ష వేదికపై నుంచి కేసీఆర్‌.. తెరాస తదుపరి కార్యాచరణ ప్రకటించే అవకాశం ఉంది.