YS Sharmila: ఏపీ పోలీసులు.. కండువా లేని వైకాపా కార్యకర్తలు: వైఎస్‌ షర్మిల

అమరావతి: సత్తెనపల్లిలో యూత్‌కాంగ్రెస్‌ నాయకులపై పోలీసులు, వైకాపా గూండాల దాడిని తీవ్రంగా ఖండిస్తున్నట్టు పీసీసీ అధ్యక్షురాలు షర్మిల తెలిపారు. పోలీసులు ఉన్నది ప్రజల కోసమా? లేక అధికార పార్టీ అడుగులకు మడుగులు ఒత్తడం కోసమా? అని ‘ఎక్స్‌’ (ట్విటర్‌) వేదికగా ప్రశ్నించారు. ‘‘ప్రజాస్వామ్య బద్ధంగా నిరసన తెలిపితే బూట్లతో తొక్కిస్తారా? గొంతు పిసికి చంపాలని చూస్తారా? వైకాపా గూండాలను పక్కన పెట్టి మరీ దాడులు చేయిస్తారా? మీరు పోలీసులా లేక వైకాపా కిరాయి మనుషులా? ఇష్టారాజ్యంగా కొట్టడానికి ఎవరిచ్చారు హక్కు? కండువా లేని వైకాపా కార్యకర్తలు మన పోలీసులు. సత్తెనపల్లి ఘటనపై డీజీపీ వెంటనే స్పందించాలి. విచక్షణారహితంగా కొట్టిన పోలీసు సిబ్బందిని వెంటనే సస్పెండ్‌ చేయాలి’’ అని డిమాండ్‌ చేశారు.