Kerala: కేరళలోని దుకాణంలో ఆసక్తికరమైన చోరీ..

కేరళ రాష్ట్రం త్రిస్సూర్‌లోని ఓ దుకాణంలో ఆసక్తికరమైన చోరీ జరిగింది. ఇద్దరు దొంగలు ఓ దుకాణంలోకి చొరబడి వస్తువులను ఎత్తుకెళ్లారు. కనిపించినవల్లా తీసుకెళ్లకుండా తమ ఇంట్లోకి కావాల్సిన సామాను మాత్రమే దోచేశారు. గ్యాస్‌ స్టౌ, టేబుల్‌ మ్యాట్లు, గొడుగు వంటి వస్తువులను తీసుకెళ్లారు. ఏ వస్తువులు దొంగతనం చేయాలో ముందుగానే అంచనాకు వచ్చి చోరీకి పాల్పడినట్లు తెలుస్తోంది. అనుకున్న వస్తువులన్నీ చోరీ చేశాక.. ఒక దొంగ క్యాష్‌ కౌంటర్‌ ఓపెన్‌ చేశాడు. అందులో ఉన్న రూ.3వేల నగదు, ఓ మొబైల్‌ ఫోన్‌ను తీసుకెళ్లిపోయాడు. వీరితో పాటు వచ్చిన మూడో వ్యక్తి దుకాణం బయట ఉన్నాడు. లోపలున్న దొంగలు తీసుకొచ్చిన వస్తువులను అతడు ఓ ఆటోలో నింపి తీసుకెళ్లాడు. శుక్రవారం అర్ధరాత్రి సమయంలో చోరీ జరిగినట్లు తెలుస్తోంది. దాదాపు రూ.80వేల విలువైన సామగ్రి చోరీకి గురైనట్లు దుకాణ యజమాని చెప్పారు. ఈ ఘటనపై పోలీసులు కేసు నమోదు చేసుకొని దర్యాప్తు చేస్తున్నారు.