Amarinder Singh: కాంగ్రెస్‌ పరాభవానికి గాంధీలే కారణం: అమరీందర్‌

చండీగఢ్‌: పంజాబ్‌తోపాటు మొత్తం ఐదు రాష్ట్రాలకు జరిగిన అసెంబ్లీ ఎన్నికల్లో కాంగ్రెస్‌ ఘోర పరాజయానికి గాంధీలే కారణమని పంజాబ్‌ లోక్‌ కాంగ్రెస్‌ అధ్యక్షుడు, మాజీ సీఎం అమరీందర్‌ సింగ్‌ ఆరోపించారు. కాంగ్రెస్‌ అధ్యక్షురాలు సోనియా గాంధీ, ఆ పార్టీ అగ్ర నేతలు రాహుల్‌ గాంధీ, ప్రియాంకా గాంధీ వాద్రాలను దృష్టిలో పెట్టుకొని సోమవారం ఓ ప్రకటనలో ఈ వ్యాఖ్య చేశారు. తాను సీఎం పదవి నుంచి దిగిపోయేనాటికి పంజాబ్‌లో కాంగ్రెస్‌ పరిస్థితి చాలా మెరుగ్గా ఉందని పేర్కొన్నారు. స్వీయ వైఫల్యాలను హుందాగా అంగీకరించకుండా.. పార్టీ వర్కింగ్‌ కమిటీ తనపైకి ఆ నిందను తోసేందుకు ప్రయత్నిస్తోందని అమరీందర్‌ విమర్శించారు. పంజాబ్‌లోనే కాకుండా ఉత్తర్‌ప్రదేశ్, ఉత్తరాఖండ్, మణిపుర్, గోవాల్లోనూ కాంగ్రెస్‌ దారుణంగా పరాజయం పాలైందని గుర్తుచేశారు.