Deepa Karmakar: దీప సస్పెండ్‌ అయ్యిందా!

దిల్లీ: భారత స్టార్‌ జిమ్నాస్ట్‌ దీపా కర్మాకర్‌ సస్పెండ్‌ అయ్యిందా! ప్రపంచ జిమ్నాస్టిక్స్‌ సమాఖ్య వెబ్‌సైట్‌ చూస్తే ఈ అనుమానం కలుగక మానదు. ప్రస్తుతం ఆడుతున్న భారత జిమ్నాస్ట్‌ల జాబితాలో దీప పేరు ఎదురుగా సస్పెండ్‌ అని ఉండగా.. మిగిలిన జిమ్నాస్ట్‌లకు యాక్టివ్‌ అని కనిపిస్తోంది. దీనిపై భారత జిమ్నాస్టిక్స్‌ సమాఖ్యకు ఎలాంటి సమాచారం లేదు. ‘‘వెబ్‌సైట్‌లో దీప సస్పెన్షన్‌ అని ఉంచడంపై ప్రపంచ జిమ్నాస్టిక్స్‌ సమాఖ్య నుంచి మాకెలాంటి సమాచారం లేదు. వాళ్ల నుంచి సమాచారం వచ్చాకే మేం ఏదైనా మాట్లాడగలం’’ అని భారత జిమ్నాస్టిక్స్‌ సమాఖ్య అధ్యక్షుడు సుధీర్‌ మిత్తల్‌ చెప్పాడు. 2016లో రియో ఒలింపిక్స్‌లో వాల్ట్‌లో నాలుగో స్థానం సాధించిన దీప.. 2019 నుంచి ఏ పోటీలో పాల్గొనలేదు.