మెరిసిన హర్మన్‌, మంధాన

టీ20 సిరీస్‌ భారత్‌ సొంతం

దంబుల్లా: శ్రీలంకతో మూడు టీ20ల సిరీస్‌ను భారత మహిళల జట్టు మరో మ్యాచ్‌ మిగిలుండగానే చేజిక్కించుకుంది. ‘ప్లేయర్‌ ఆఫ్‌ ద మ్యాచ్‌’ హర్మన్‌ప్రీత్‌ కౌర్‌ (31 నాటౌట్‌; 32 బంతుల్లో 24), స్మృతి మంధాన (39; 34 బంతుల్లో 84) సత్తా చాటడంతో శనివారం రెండో టీ20లో టీమ్‌ఇండియా 5 వికెట్ల తేడాతో లంకను ఓడించింది. మొదట బ్యాటింగ్‌ చేసిన లంక 20 ఓవర్లలో 7 వికెట్లకు 125 పరుగులే చేసింది. ఓపెనర్లు విష్మి గుణరత్నే (45; 50 బంతుల్లో 64), చమరి ఆటపట్టు (43; 41 బంతుల్లో 74, 16) తొలి వికెట్‌కు 87 పరుగులు జత చేసి శుభారంభం ఇచ్చారు. కానీ వీళ్లిద్దరూ వెనుదిరిగాక లంక తడబడింది. క్రమం తప్పకుండా వికెట్లు కోల్పోయి అనుకున్న దానికంటే తక్కువ స్కోరుకే పరిమితమైంది. ఒక దశలో 87/0తో ఉన్న లంక 38 పరుగుల తేడాతో 7 వికెట్లు కోల్పోయింది. భారత బౌలర్లలో దీప్తిశర్మ రెండు వికెట్లు తీయగా.. రేణుక, రాధ, పూజ, హర్మన్‌ప్రీత్‌ తలా వికెట్‌ పడగొట్టారు. ఛేదనలో భారత్‌ 5.4 ఓవర్లలో 48/2తో నిలిచింది. షెఫాలీవర్మ (17), సబ్బినేని మేఘన (17) త్వరగా పెవిలియన్‌ చేరారు. ఈ స్థితిలో స్మృతి, హర్మన్‌ ఇన్నింగ్స్‌ను నడిపించారు. మంధానతో పాటు జెమీమా (3), యస్తికా (13) వికెట్లు పడినా.. దీప్తిశర్మ (5 నాటౌట్‌)తో కలిసి హర్మన్‌ జట్టును గెలిపించింది. భారత్‌ 19.1 ఓవర్లలో 5 వికెట్లు కోల్పోయి లక్ష్యాన్ని అందుకుంది.