షాబాజ్‌ అహ్మద్‌కు పిలుపు

జింబాబ్వేతో సిరీస్‌కు టీమ్‌ఇండియాలో చోటు

దిల్లీ: బ్యాటింగ్‌ ఆల్‌రౌండర్‌ షాబాజ్‌ అహ్మద్‌కు భారత సెలక్టర్ల నుంచి పిలుపు అందింది. ఐపీఎల్‌లో   సత్తా చాటిన ఈ ఆటగాడు.. వాషింగ్టన్‌ సుందర్‌ స్థానంలో జింబాబ్వేతో వన్డే సిరీస్‌కు ఎంపికయ్యాడు. బెంగాల్‌కు చెందిన 27 ఏళ్ల షాబాజ్‌ 2022 ఐపీఎల్‌లో ఆల్‌రౌండ్‌ ప్రదర్శనతో ఆకట్టుకున్నాడు. రాయల్‌ చాలెంజర్స్‌ బెంగళూరుకు ప్రాతినిధ్యం వహించిన అతడు 41.64     సగటుతో 219 పరుగులు చేశాడు. ఎడమచేతి వాటం స్పిన్‌తో నాలుగు వికెట్లు పడగొట్టాడు. ‘‘అఖిలభారత సెలక్షన్‌ కమిటీ సుందర్‌ స్థానంలో షాబాజ్‌ను జింబాబ్వేతో వన్డే సిరీస్‌కు ఎంపిక చేసింది’’ అని బీసీసీఐ ఓ ప్రకటనలో తెలిపింది. ఇంగ్లాండ్‌లో కౌంటీ మ్యాచ్‌ ఆడుతూ గాయపడ్డ సుందర్‌.. జింబాబ్వే పర్యటనకు దూరమైన సంగతి తెలిసిందే. భారత్‌, జింబాబ్వే మధ్య తొలి వన్డే గురువారం జరుగుతుంది.