శుభి, చార్వీలకు టైటిళ్లు

ప్రపంచ క్యాడెట్‌ చెస్‌

బటుమి (జార్జియా): ప్రపంచ చదరంగ వేదికపై మరోసారి భారత ప్లేయర్లు సత్తాచాటారు. ఫిడె ప్రపంచ క్యాడెట్స్‌ చెస్‌ ఛాంపియన్‌షిప్స్‌లో మంగళవారం శుభి గుప్తా, చార్వి టైటిళ్లు దక్కించుకున్నారు. బాలికల అండర్‌-12 విభాగంలో 11 రౌండ్ల నుంచి  8.5 పాయింట్లు సాధించిన శుభి అగ్రస్థానాన్ని కైవసం చేసుకుంది. అండర్‌-8 విభాగంలో  9.5 పాయింట్లతో చార్వి ఛాంపియన్‌గా నిలిచింది. 11 రౌండ్లు ముగిసే సరికి బోధన శివానందన్‌ (ఇంగ్లాండ్‌)తో కలిసి సమంగా నిలిచిన ఆమె.. మెరుగైన టైబ్రేకర్‌ స్కోరుతో టైటిల్‌ ఖాతాలో వేసుకుంది. అండర్‌-8 బాలుర విభాగంలో సఫీన్‌ సఫరుల్లాఖాన్‌   9 పాయింట్లతో కాంస్యం గెలుచుకున్నాడు. తొలి రెండు స్థానాల్లో నిలిచిన మార్క్‌ (ఫ్రాన్స్‌), రోమన్‌ (రష్యా) కంటే అతను కేవలం 0.5 పాయింట్‌తో వెనకబడ్డాడు.