WI vs IND: అప్పుడు ఆడిన వాళ్లలో ఇప్పుడు ఇద్దరమే ఉన్నాం: విరాట్ కోహ్లీ

ఇంటర్నెట్ డెస్క్:  భారత జట్టు ప్రస్తుతం వెస్టిండీస్‌ (West Indies)పర్యటనలో ఉన్న సంగతి తెలిసిందే. ఈ టూర్‌లో కరేబియన్‌ జట్టుతో టీమ్‌ఇండియా (Team India) రెండు టెస్టులు, మూడు వన్డేలు, ఐదు టీ20లు ఆడనుంది. జులై 12 నుంచి డొమినికా వేదికగా మొదటి టెస్టు ప్రారంభంకానుంది. ఈ మ్యాచ్‌కు రెండు రోజులే మిగిలి ఉన్న నేపథ్యంలో టీమ్‌ఇండియా స్టార్‌ క్రికెటర్ విరాట్‌ కోహ్లీ (Virat Kohli)సోషల్ మీడియాలో ఆసక్తికర పోస్టు చేశాడు. ప్రధాన కోచ్‌ రాహుల్ ద్రవిడ్‌ (Rahul Dravid) తో కలిసి దిగిన ఫోటోను విరాట్ పోస్ట్ చేస్తూ 2011లో వెస్టిండీస్‌లో తామిద్దరం భారత తరఫున ఆడిన విషయాన్ని గుర్తుచేసుకున్నాడు. మరో విశేషమేమిటంటే.. అప్పుడు టీమ్‌ఇండియా తరఫున ఆడి ప్రస్తుత సిరీస్‌లో భాగం అవుతున్నది విరాట్ కోహ్లీ, ద్రవిడ్‌ మాత్రమే.

• ఇదీ చదవండి: రోహిత్‌ శర్మ నుంచి ఎక్కువ ఆశించా.. ఆటగాళ్ల మధ్య గ్యాప్‌ పెరగడానికి అదీ ఒక కారణం: గావస్కర్‌

‘‘2011లో డొమినికాలో మేం చివరి టెస్ట్‌ ఆడాం. అప్పుడు భారత్‌కు ఆడిన వాళ్లలో ఇద్దరం (రాహుల్ ద్రవిడ్, కోహ్లీ) మాత్రమే ఈ సిరీస్‌లో భాగమవుతున్నాం. ఈ ప్రయాణం మమ్మల్ని విభిన్న సామర్థ్యాలతో ఇక్కడికి తీసుకువస్తుందని ఎప్పుడూ ఊహించలేదు’’ అనే క్యాప్షన్‌ను జోడించి ద్రవిడ్‌తో కలిసి దిగిన ఫొటోను విరాట్ సామాజిక మాధ్యమాల్లో పోస్ట్ చేశాడు. ప్రస్తుతం ఈ పోస్ట్ సోషల్ మీడియాలో వైరల్‌గా మారింది. 2011లో టీమ్‌ఇండియా వెస్టిండీస్‌లో పర్యటించింది. విండీస్‌తో ఒక టీ20, ఐదు వన్డేలు, మూడు టెస్టులు ఆడింది. మొదటి టెస్టులో భారత్ 63 పరుగుల తేడాతో విజయం సాధించింది. తొలి ఇన్నింగ్స్‌లో 40 పరుగులు, రెండో ఇన్నింగ్స్‌లో శతకం (112) బాదిన ద్రవిడ్ ప్లేయర్‌ ఆఫ్‌ ది మ్యాచ్‌గా నిలిచాడు. మిగతా రెండు టెస్టులు డ్రాగా ముగిశాయి.