అంకురాల్లో అగ్రస్థానం ఊహించిందే

ఇంకా ఎంతో సాధించాలి: మంత్రి కేటీఆర్‌ 

ఈనాడు,హైదరాబాద్‌: అంకురాల్లో భారీ అభివృద్ధితో తెలంగాణ అగ్రస్థానం పొందడంపై రాష్ట్ర పరిశ్రమలు, ఐటీ శాఖల మంత్రి కేటీఆర్‌ హర్షం వ్యక్తం చేశారు. టీహబ్‌, వీహబ్‌లను ఆయన అభినందించారు. ఈ ఫలితం తాను ఊహించిందేనని, కేంద్ర ప్రభుత్వం ప్రకటించిన మొదటి ర్యాంకు తనను ఆశ్చర్యపరచలేదని మంగళవారం ట్విటర్‌లో తెలిపారు. అయితే ఈ రంగంలో ఇంకా చాలా దూరం వెళ్లాలని, సాధించాల్సింది ఎంతో ఉందన్నారు. ప్రపంచంలో ఎక్కడా లేని విధంగా తెలంగాణలో టీహబ్‌, వీహబ్‌, రాష్ట్ర ఆవిష్కరణల విభాగం (టీఎస్‌ఐసీ), టీవర్క్స్‌, హైదరాబాద్‌ పరిశోధన, ఆవిష్కరణల మండలి (రిచ్‌), అగ్రిహబ్‌ల వంటి ఆవిష్కరణ సంస్థలు ఉండడం గర్వకారణమని ఆయన పేర్కొన్నారు.