సామూహిక జాతీయ గీతాలాపనలో పాల్గొనండి

ప్రజలకు సీఎస్‌ సోమేశ్‌కుమార్‌ పిలుపు
16న ఉదయం 11.30కి రాష్ట్రవ్యాప్తంగా నిర్వహిస్తామని వెల్లడి

ఈనాడు, హైదరాబాద్‌: స్వతంత్ర భారత వజ్రోత్సవాలలో భాగంగా ఈ నెల 16న రాష్ట్రవ్యాప్తంగా సామూహిక జాతీయ గీతం ఆలాపన కార్యక్రమాన్ని నిర్వహిస్తున్నామని.. ప్రజలందరూ పాల్గొని విజయవంతం చేయాలని తెలంగాణ ప్రభుత్వ ప్రధానకార్యదర్శి సోమేశ్‌కుమార్‌ కోరారు. శుక్రవారం తన కార్యాలయంలో ఈ కార్యక్రమంపై సమీక్ష నిర్వహించారు. రాష్ట్రంలోని గ్రామ పంచాయతీ కార్యాలయాలు, స్థానిక పురపాలక వార్డులు, ముఖ్యమైన ప్రధాన జంక్షన్లు, పాఠశాలలు, కళాశాలలు, అంగన్‌వాడీ కేంద్రాలు, జైళ్లు, కార్యాలయాలు, మార్కెట్‌ స్థలాలు, గుర్తించిన ఇతర ప్రదేశాలలో 16న ఉదయం 11.30 గంటలకు సామూహిక జాతీయ గీతాన్ని ఆలపించాలని ఆయన కోరారు. కలెక్టర్లు, ఎస్పీలు, పోలీసు కమిషనర్లతో సమన్వయం చేసుకొని అన్ని శాఖలూ కార్యాచరణ ప్రణాళికను సిద్ధం చేసుకోవాలని ఆయన సూచించారు. తగిన ఏర్పాట్లు చేయాలని అధికారులను ఆదేశించారు. ఆయా ప్రదేశాలలో నోడల్‌ అధికారులను నియమించి, మైక్‌ సిస్టమ్‌ ఏర్పాటు చేసుకోవాలని సూచించారు. కార్యక్రమానికి స్థానికంగా విస్తృత ప్రచారం చేయాలని ఆయన కోరారు.