ప్రభుత్వ వ్యవసాయ సలహాదారుగా చెన్నమనేని రమేశ్‌బాబు!

ఈనాడు, హైదరాబాద్‌: రాష్ట్ర ప్రభుత్వ వ్యవసాయ సలహాదారుగా వేములవాడ ఎమ్మెల్యే చెన్నమనేని రమేశ్‌బాబును నియమించాలని సీఎం కేసీఆర్‌ నిర్ణయించారు. కేబినెట్‌ హోదాతో ఆయన అయిదేళ్ల పాటు ఈ పదవిలో కొనసాగనున్నారు. ఈ మేరకు ఉత్తర్వులు వెలువరించాలని శుక్రవారం సీఎం కార్యాలయం అధికారవర్గాలను ఆదేశించింది. నాలుగు దఫాలుగా ఎమ్మెల్యేగా ఎన్నికైన రమేశ్‌బాబుకు పౌరసత్వ సమస్యల దృష్ట్యా వచ్చే శాసనసభ ఎన్నికల్లో భారాస టికెట్‌ ఇవ్వరాదని కేసీఆర్‌ నిర్ణయించారు. దీనిపై చెన్నమనేని అసంతృప్తికి గురవడంతో సీఎం బుజ్జగించినట్లు తెలిసింది. రమేశ్‌బాబు జర్మనీ హంబోల్ట్‌ విశ్వవిద్యాలయంలో వ్యవసాయ ఆర్థికశాస్త్రంపై పరిశోధనలు చేసి డాక్టరేట్‌ పొందారు. దీన్ని దృష్టిలో ఉంచుకునే ఆయనను రాష్ట్ర వ్యవసాయ సలహాదారుగా నియమించాలని సీఎం నిర్ణయించినట్లు సమాచారం.