Published : 24/08/2022 01:27 IST

ఆఫీసులో ఎలా ఉండాలి?

నా వయసు 30లోపు. నాతో పనిచేసే సీనియర్‌కి 45. ఆమె ఇటీవల ఓ జూనియర్‌ని ఇంటర్వ్యూ చేసింది. ఆ తర్వాత ‘ఈ తరం పిల్లల్లో మర్యాద, పని ప్రదేశంలో ఎలా ఉండాలనేవి తెలీడం లేదు’ అంది. నేనూ ఈతరం అమ్మాయినేగా! అది వినగానే కాస్త ఇబ్బందిగా అనిపించింది. పని ప్రదేశంలో మర్యాద చూపిస్తూనే ప్రొఫెషనల్‌గా ఎలా నడచుకోవాలి?

- శ్రిద, బెంగళూరు

పనిచేసే చోట ఎలా నడుచుకోవాలనేదీ నేర్చుకోవడంలో భాగమే. అది నెమ్మదిగా అలవాటవుతుంది. మీరు ఈ అంశాలపై దృష్టిపెట్టండి.

* ఎవరైనా ఏదైనా చెబుతున్నప్పుడు మధ్యలో దాన్ని ఆపడం, వినకపోవడం లాంటివి చేయొద్దు. మీ అభిప్రాయం చెప్పాలన్న తొందరొద్దు. చెప్పేది సాంతం వినండి. మీ ఆలోచనలను పంచుకోవడానికి ముందు ‘దీని గురించి మీరు ఇంకా ఏమైనా చెప్పాలనుకుంటున్నారా?’ అని అడిగాకే కొనసాగించండి.

* ‘ప్లీజ్‌’, ‘థాంక్యూ’.. సహోద్యోగులు, మేనేజర్‌, కస్టమర్లు.. స్థాయి ఏదైనా సంభాషణల్లో అవసరమైన చోట వీటిని ఉపయోగించడం తప్పనిసరి.

* బాస్‌ను మెప్పించాలని సహోద్యోగులపై నిఘా వేయడం, వాళ్లపై ఫిర్యాదులు చేయడం లాంటివొద్దు. బాస్‌ను విమర్శిస్తూ పక్కవాళ్లతో అభిప్రాయాలు పంచుకోవడం లాంటివీ మంచిదికాదు. ఇతరుల పని, ఆలోచనలు, విజయాల్లో భాగం తీసుకోవాలన్న తాపత్రయం వద్దు.

* అందరి కంటే ముందు రావడం, ఆ తర్వాతే వెళ్లడం చేస్తేనే పనిచేస్తున్నట్లు కాదు. మీ పనివేళల్లో ప్రభావవంతంగా చేస్తే చాలు. మరీ అవసరమైతే తప్ప ఈ ధోరణికి అలవాటు పడకండి. ముఖ్యమైన విషయాలు, మీటింగ్‌లను మర్చిపోవడం మీ నిర్లక్ష్య ధోరణికి నిదర్శనం. అలాంటివాటిని ఓ చోట రాసిపెట్టుకొని అయినా సమయానికి హాజరవ్వండి.

* మనవాళ్లతో ఫోన్‌ సంభాషణల్లో సమయం, స్వరంలో హెచ్చుతగ్గులను గమనించుకోం. అవి పక్కవాళ్లకి ఇబ్బందిగా తోయొచ్చు. అందుకే వ్యక్తిగత కాల్స్‌ను ఆఫీసు వేళలయ్యాక చూసుకోవడం మేలు. లేదూ మెసేజ్‌లు చేయడమో, పక్కకువెళ్లి మాట్లాడటమో చేయాలి.


గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని

బ్యూటీ & ఫ్యాషన్

ఆరోగ్యమస్తు

అనుబంధం

యూత్ కార్నర్

'స్వీట్' హోం

వర్క్ & లైఫ్

సూపర్ విమెన్