విరిగిన పాలతో ఇలా!

వేసవిలో వేడికి పదే పదే పాలు విరిగిపోవడం చూస్తుంటాం. అలాగని విరిగిన ప్రతిసారీ వాటిని బయటపడేయలేం.. కలాకండ్‌, పనీర్‌.. వంటివీ తరచూ చేసుకోలేం. అందుకే ఇవే కాకుండా.. ఈ విరిగిన పాలను వివిధ రకాలుగా ఉపయోగించుకోవచ్చంటున్నారు నిపుణులు. అదెలాగో చూద్దాం రండి..

⚛ బేకింగ్‌ మిశ్రమాన్ని కలిపే క్రమంలో పెరుగు, బటర్‌, క్రీమ్‌ వంటివి ఉపయోగించడం సహజమే. అయితే వీటికి బదులుగా విరిగిన పాలనూ వినియోగించచ్చంటున్నారు నిపుణులు. ముఖ్యంగా బ్రెడ్‌, ప్యాన్‌కేక్స్‌, కేక్స్‌.. వంటి బేకింగ్‌ మిశ్రమాల తయారీలో ఈ పాలను ఉపయోగిస్తే అవి మరింత రుచికరంగా, పర్‌ఫెక్ట్‌గా వస్తాయంటున్నారు.

⚛ కొంతమందికి కాలంతో సంబంధం లేకుండా చర్మం పొడిబారుతుంటుంది.. పొలుసులుగా ఊడిపోతుంది. ఇలాంటప్పుడు విరిగిన పాల మిశ్రమాన్ని చర్మానికి అప్లై చేసుకొని కాసేపు మర్దన చేసుకోవాలి. పావుగంట తర్వాత నీటితో కడిగేసుకుంటే చక్కటి ఫలితం ఉంటుంది. ఈ చిట్కా చర్మానికి మెరుపునూ అందిస్తుంది.

⚛ విరిగిన పాలలో క్యాల్షియం ఎక్కువగా ఉంటుంది. ఇది మొక్కలు ఏపుగా పెరిగేందుకు దోహదం చేస్తుంది. అందుకే ఈ మిశ్రమాన్ని మొక్కల మొదళ్లలో, ముఖ్యంగా టొమాటో చెట్ల మొదళ్లలో వేస్తే ఆశించిన ఫలితం వస్తుంది.

⚛ విరిగిన పాలతో పెరుగూ తయారుచేసుకోవచ్చట. ఈ పాలను మరిగించి గోరువెచ్చగా మారాక.. ఇందులో రెండు టీస్పూన్ల పెరుగు వేస్తే.. కొన్ని గంటలకు గడ్డ పెరుగు తయారవుతుందట! మీరూ ఓసారి ట్రై చేయండి!

⚛ చికెన్‌, మటన్‌, చేపలు.. తదితర మాంసాహార వంటకాల తయారీలో పెరుగు, మజ్జిగను వాడుతుంటాం. అయితే వీటికి బదులుగా విరిగిన పాలతోనూ ఈ మాంసాన్ని మ్యారినేట్‌ చేసుకోవచ్చంటున్నారు నిపుణులు. తద్వారా వంటకాల రుచి ఇనుమడిస్తుందంటున్నారు.

⚛ కాయగూరలు, పండ్లతో తయారుచేసుకునే సలాడ్‌ డ్రస్సింగ్‌ కోసమూ ఈ విరిగిన పాలను ఉపయోగించచ్చట! తద్వారా వాటి రుచి పెరుగుతుంది.

⚛ కోడిగుడ్డుతో ఆమ్లెట్‌, పొరటు.. వంటివి తయారుచేసుకునేటప్పుడు ముందుగా గుడ్లను బీట్‌ చేస్తుంటాం. ఈ క్రమంలో కొన్ని విరిగిన పాలను వేసి బీట్‌ చేస్తే.. అవి మరింత రుచిగా వస్తాయట!

⚛ స్మూతీస్‌ తయారీలోనూ విరిగిన పాలను వాడడం వల్ల వాటి చిక్కదనం, రుచి.. రెండూ పెరుగుతాయి.